KXDR yetakchisi kuz boshlanganidan beri ilk bor o‘z ayoli bilan ko‘chaga chiqdi

Hassaga tayangan KXDR yetakchisi Kim Chen Inning surat va videolavhalari mamlakat rasmiy OAVlari tomonidan tarqatildi. Bu safar rasmlarda ilk bor Kim Chen Inning turmush o‘rtog‘i ham tasvirlandi, deb xabar bermoqda “Segodnya”.

Shimoliy Koreya OAVlari ma’lumotiga ko‘ra, Kim Chen In va Li Sol Chju Incheon (Janubiy Koreya)da bo‘lib o‘tgan Osiyo o‘yinlarida va sport gimnastikasi bo‘yicha jahon chempionatida zafar quchgan sportchilar bilan uchrashdi.

Mamlakat davlat televideniyesi orqali KXDR rahbarining mazkur musobaqalar g‘oliblari va sovrindorlari, shuningdek, murabbiylarga minnatdorlik bildirib, ular bilan birgalikda suratga tushayotgani namoyish etildi. Biroq uchrashuv vaqti va joyi haqida OAVlarida ma’lumot berilmadi.

Eslatib o‘tamiz, avvalroq mamlakat OAVlari Kim Chen Inning Politexnika universiteti o‘qituvchilari uchun mo‘ljallangan yangi turar joy majmualariga tashrifini yoritgani haqida xabar berilgan.