Sirg‘ali tumanida 45 ming kvadrat metr maydonni egallagan texnopark paydo bo‘ldi. Bu haqda tuman hokimi Furqat Maqsudxo‘jayev Toshkentda bo‘lib o‘tgan matbuot anjumanida ma’lum qildi, deb yozadi 12news.uz.

Ma’lum bo‘lishicha, ushbu maydonni mebel, polietilen mahsulotlar, sintepon va boshqalarni ishlab chiqaruvchi 50 nafar tadbirkor egallagan.

Hokim so‘zlariga ko‘ra, kelajakda ularning faoliyatiga ko‘mak berish maqsadida “Yagona oyna” markazi, “Sirg‘alida tadbirkorlik qil” maxsus internet-portali, shuningdek yangi sanoat hududlari yaratiladi.

“Joriy yilning o‘zidayoq tumanni ijtimoiy-iqtisodiy rivojlantirish dasturi doirasida 338 ta loyihani amalga oshirish ko‘zda tutilgan. Natijada 3355 ta yangi ish o‘rinlari yaratilib, u yerga kollej bitiruvchilari jalb etiladi”, — dedi Furqat Maqsudxo‘jayev.