Saudiya Arabistoni Ta’lim vazirligi mashhur muallimlarni BMW avtomobili va 10 mingdan 120 minggacha saudiya riali (2,5 mingdan 32 ming AQSh dollargacha) bilan taqdirlashga qaror qildi, deb xabar bermoqda Arab News.
Mukofotlarga eng yaxshi muallimlar va maktab direktorlari da’vo qilishi mumkin. A’lochi o‘quvchilarni ham alohida e’tirof etish taklif qilinmoqda, ammo ularni qay usulda taqdirlash masalasiga hali aniqlik kiritilmadi.
Ma’lum qilinishicha, ta’lim vazirligi 2014-yil sovrindorlarini allaqachon tanlab bo‘lgan. Vazirlik vakillarining ta’kidlashicha, BMW avtomobillari bilan taqdirlash juda yaxshi motivatsiya bo‘lishi kerak.
Saudiya Arabistoni byudjetining to‘rtdan bir qismidan ko‘prog‘i ta’lim sohasiga sarflanadi. Qirollikda 8 ta universitet, 24 mingdan ortiq maktab, ko‘plab kolledj va boshqa ta’lim muassasalari faoliyat yuritadi.
Qirollik fuqarolari bepul ta’lim oladi. Bundan tashqari, hukumat talabalar ta’lim olishi uchun barcha shart-sharoitlarni yaratib beradi, hamda ularni adabiyot bilan ta’minlaydi.
Izoh (0)