Rossiya hukumati Qrimga taktik yadro quroli yetkazib beruvchi qurilmalarni, jumladan Tu-22M3 strategik bombardimonchilarni hamda “Iskandar-M” tezkor-taktik raketa majmualarini joylashtirishni rejalashtirmoqda.
Bu haqda AQSh kongressmenlari Barak Obamaga yozgan maktublarida ma’lum qildi, deya xabar bermoqda “Kommersant”.
AQSh Senatining qurolli kuchlar bo‘yicha qo‘mitasi a’zosi Jeyms Inofe fikricha, bu 1987-yilda Sobiq Ittifoq tomonidan imzolangan o‘rta va kichik masofadagi raketalarni yo‘q qilish haqidagi Bitimni to‘g‘ridan-to‘g‘ri buzishdir.
“Bu Rossiyaga mintaqada harbiy ustunlikka ega bo‘lib, NATO bazalariga bevosita yaqin kelish imkonini beradi”, — deya qayd etdi kongressmenlar.
Kongress a’zolarining ta’kidlashicha, Rossiya rahbariyatining noqonuniy harakatlari RF va NATO o‘rtasida 1997-yilda tuzilgan shartnomalarni qo‘pol ravishda buzib, Rossiya harbiylariga alyans bazalari va obyektlarida bo‘lish imkonini beradi.
Qonun chiqaruvchilar AQSh prezidentidan javob harakatlarini talab qilmoqda. Ular xususan alyans a’zolari va Moskva o‘rtasidagi barcha aloqalarni butunlay uzishni, shuningdek Rossiya harbiylarini NATO bazalari va obyektlaridan chiqarib yuborishni taklif qilmoqda.
Izoh (0)