Rossiya Ichki ishlar vazirligi Checheniston bo‘yicha vakilining 18-oktabr kuni bergan ma’lumotiga ko‘ra, Checheniston poytaxti Grozniy shahrida 5-oktabr kuni yuz bergan portlashni tashkillashtirgan shaxs yo‘q qilindi. Bu haqda “TASS”ga tayanib, Kommersant.ru xabar bermoqda.
“Bugun Grozniyning Staropromislovskaya tumanida operativ ma’lumotlarni o‘rganib chiqish davomida respublika poytaxtida 5-oktabr kuni portlashni tashkillashtirgan shaxs uni qo‘lga olish vaqtida halok bo‘ldi. U noqonuniy qurollangan guruhlarning federal qidiruvdagi faol a’zosi bo‘lgan 1981-yilda tug‘ilgan Aslan Alisxonov bo‘lib chiqdi”, — deyiladi xabarda.
Ma’lum qilinishicha, mazkur operatsiya vaqtida huquqni himoya qiluvchi kuchlardan ham, tinch aholidan ham hech kimga jarohat yetmagan.
Ayni damda voqea sodir bo‘lgan joyda tezkor qidiruv guruhi ish olib bormoqda.