Shahrisabzlik yigit otasining vafotidan so‘ng, undan qolgan oshxonani yurgizishni istamay, bir tanishiga ijaraga beradi. Yigit shu tariqa tanishining turmushi buzilib, uyiga qaytib kelgan qizi bilan gaplashib yuradi. Qiz ham yigitni bee’tibor qoldirmadi va hatto uyiga ham taklif qila boshlaydi. Yigit esa bundan unumli foydalanib, xonadondagi narsalar haqida ma’lumot yig‘a boshladi. Bu haqda O‘zbekiston Ichki ishlar vazirligining “Postda” gazetasi xabar bermoqda.
“Oshiq-ma’shuqlar” munosabatidan xabar topgan ota qizini tog‘asinikiga jo‘natib yuboradi. Yigit esa anchadan buyon o‘ylab yurgan rejasini amalga oshirishga kirishadi. Uy egalari ishga ketgach, xonadonga devordan oshib tushgan shahrisabzlik seyfda saqlanayotgan katta miqdordagi pul, AQSh dollari va turli qimmatbaho buyumlarni yelim xaltaga solib chiqib ketadi. Buyumlarni tanishlari orqali pullab, boyib ketgan yigit dang‘illama to‘y qilib uylanib oladi.
Oradan ikki oycha o‘tib, u yana bir “tanish ayol” do‘koniga o‘g‘rilikka tushib, tanishining tilla taqinchoqlar solingan sumkasiga g‘aznadagi pullarni ham joylab qochadi.
Shundan so‘ng, yigit uch do‘sti bilan Shahrisabz shahri Ipak yo‘li ko‘chasida ishlaydigan tanishining telefon ta’mirlash ustaxonasiga o‘g‘rilikka tushadi. Temir panjarani buzib, ustaxona ichidan kompyuter monitori va protsessori, 600 ming so‘m pul hamda fuqarolar tomonidan ta’mirlash uchun qoldirilgan uch planshetni o‘g‘irlab ketadi.
“Jinoiy guruh a’zolari o‘g‘irlangan buyumlarni shahrisabzlik yigitning uyiga yashirib qo‘yadi, — dedi Shahrisabz tumani IIB tergovchisi. — Hamtovoqlar o‘ljalar sotilganidan keyin pullarni taqsimlashga kelishib tarqaladi”.
Ertasi kuni o‘zining telefon ta’mirlash ustaxonasiga kelgan usta esa ahvolni ko‘rib, zudlik bilan tuman IIBga qo‘ng‘iroq qiladi. Voqea joyiga yetib kelgan tergov-tezkor guruhi a’zolari surishtiruv ishlarini boshlaydi.
Voqea joyidan olingan qo‘l-barmoq izlari orqali jinoyatchilar topilib, ashyoviy dalillar bilan qo‘lga olindi.
Izoh (0)