O‘zbek estradasida o‘z o‘rniga va muxlislariga ega “Shahzod” guruhi ijodkorlari katta loyiha ustida ish boshlagan. Repertuaridagi barchaga qadrdon qo‘shiqlaridan ayrimlarini o‘ziga xos ravishda qayta ijro etgan Rashid Holiqov retro taronalarga yana murojaat etmoqda. Bu haqda Popcorn.uz xabar beradi.
Rashid Holiqovning yaqindagina premyera qilingan “Quralay” taronasi muxlislar tomonidan juda yaxshi kutib olindi. Shu sababli Rashid Holiqov xalqning dilidan joy olgan taronalardan to‘plam tayyorlash niyatida ekanligini bildirdi.
Ma’lum bo‘lishicha, ayni kunlarda Rashid Holiqov studiyada tinim bilmay ijod bilan band bo‘lib, o‘zbek milliy qo‘shiqlarini ijro etmoqda. Hatto muxlislariga sovg‘a sifatida mazkur qo‘shiqlardan iborat yangi albom taqdim etishni maqsad qilgan. Albom “Milliy” deb nomlanib, undan jami 14 ta remiks va zamonaviy aranjirovka qilingan milliy va o‘zbek retro filmlarida yangragan qo‘shiqlar joy oladi. Ijodkorning aytishicha, bunday albom chiqarishni u anchadan buyon niyat qilgan.
Shuni ham aytish joiz, qo‘shiqlarga Shuhrat Zokirov zamonaviy sayqal bergan. Dekabr oyining o‘rtalarida xonandaning “Milliy” deb nom olgan albom taqdimoti san’atkorlar davrasida bayramona tarzda o‘tkazilishi rejalashtirilgan. Taxminlarga ko‘ra, “Shahzod” guruhi endi mutlaqo milliy yo‘nalishda ijod qilishini ommaga aynan o‘sha kuni oshkor etadi.
Izoh (0)