O‘tgan hafta mobaynida respublikamiz hududida 158 ta yong‘in qayd etildi. Turli sabablarga ko‘ra sodir bo‘lgan yong‘inlarda 1 nafar fuqaro kuyish tan jarohati olgan va 2 nafar fuqaro halok bo‘lgan. Ushbu yong‘inlarda 720 587 595 so‘m miqdorida qurilish materiallari va 608 311 590 so‘m miqdorida  moddiy boyliklar yong‘indan saqlab qolingan. Bu haqda O‘zbekiston Respublikasi Ichki ishlar vazirligi rasmiy sayti xabar berdi.

Sirdaryo viloyati Guliston tumanida yashovchi 1958-yilda tug‘ilgan U.Kenjaboyevning uyida elektr simlarining qisqa tutashuvi natijasida yong‘in sodir bo‘lib, uyning 34 kvadrat metr maydonda ichki qismi va jihozlari yonib zararlangan. Eng achinarlisi, yong‘in o‘chirish vaqtida uy egasining 1 yoshli nabirasiga tegishli kuygan holdagi jasad topilgan.

Buxoro viloyati Olot tumanida yashovchi R.Bo‘riboyevning uyida elektr simlarining qisqa tutashuvi natijasida yong‘in sodir bo‘lib, uyning 72 kvadrat metr maydonda tom, shifti va uy jihozlari yonib zararlangan. Yong‘in o‘chirish vaqtida uy egasining qizi 1-guruh nogironi N.Bo‘riboyevaning kuygan holdagi jasadi topilgan.

Jizzax viloyati Jizzax tumanida yashovchi A.Qosimovning uyida yong‘in sodir bo‘lib, uyning 200 kvadrat metr maydonda tomi, shifti va uy jihozlari yonib zararlangan. Yong‘in elektr simlarining qisqa tutashuvi natijasida sodir bo‘lgan.