6-oktabr kuni O‘zbekiston Xalq demokratik partiyasi Markaziy saylov komissiyasiga parlament saylovida ishtirok etish uchun zarur hujjatlarni taqdim qildi. Bu haqda O‘zbekiston Milliy axborot agentligi xabar bermoqda.

Shu bilan birga, siyosiy partiyalar tomonidan saylovchilarning partiyani qo‘llab-quvvatlovchi imzolarini to‘plash jarayoni yakunlandi. Har bir partiya saylovda uni qo‘llab-quvvatlaydigan saylovchilarning kamida 40 mingta imzosini to‘plashi zarur edi. Bunda O‘zbekistonning bitta ma’muriy-hududiy tuzilmasida to‘plangan imzolar soni talab etilgan imzolar sonining sakkiz foizidan oshmasligi lozim.

Shunday qilib, barcha siyosiy partiyalar: Tadbirkorlar va ishbilarmonlar harakati — O‘zbekiston Liberal-demokratik partiyasi, O‘zbekiston “Milliy tiklanish” demokratik partiyasi, O‘zbekiston Xalq demokratik partiyasi, O‘zbekiston “Adolat” sotsial-demokratik partiyasi parlament saylovida ishtirok etish uchun tegishli hujjatlarni Markaziy saylov komissiyasiga topshirdi.

Markaziy saylov komissiyasida imzo varaqalari to‘g‘ri to‘ldirilganligini tekshirish bo‘yicha ishchi guruhi o‘z ishini davom ettirmoqda. Uning tarkibida Markaziy saylov komissiyasi a’zolari, jamoat tashkilotlarining vakillari, ichki ishlar, adliya organlarining, shuningdek, aholini hisobga olish bilan shug‘ullanuvchi muassasalarning mutaxassislari bor.

Imzo varaqalarini tekshirish jarayonida har bir siyosiy partiyaning vakolatli vakili ham ishtirok etyapti.

Markaziy saylov komissiyasi taqdim etilgan hujjatlar asosida qonunda belgilangan muddatda partiyaning saylovda qatnashishiga ijozat berish to‘g‘risida uzil-kesil qaror qabul qiladi.

Ma’lumot o‘rnida, “O‘zbekiston Respublikasi Oliy Majlisiga saylov to‘g‘risida”gi O‘zbekiston Respublikasi qonunining 7-moddasiga binoan parlamentning Qonunchilik palatasiga saylov 135 ta hududiy bir mandatli saylov okrugi bo‘yicha ko‘ppartiyaviylik asosida o‘tkaziladi.