O‘tgan hafta so‘ngida Markaziy Yaponiyada Ontake vulqonining otilishi natijasida 50 kishi halok bo‘lgani shifokorlar tomonidan tasdiqlandi. Bu haqda shanba kuni Yaponiyada Favqulodda vaziyatlar vazirligi vazifasini bajaruvchi mahalliy yong‘in boshqarmasida berilgan ma’lumotga tayanib, “TASS” xabar qilmoqda.

Bir hafta avval harakatga kelgan vulqon yonbag‘irlarida qutqaruv operatsiyalari davom etayotgan bo‘lib, ularda mingga yaqin Yaponiya mudofaa kuchlari harbiylari, o‘t o‘chiruvchilar va politsiya xodimlari qatnashmoqda.

Shanba kuni qutqaruvchilar yana to‘rt kishining jasadini topishga muvaffaq bo‘ldi. Tabiiy hodisa sodir bo‘lgan vaqtda rasman Ontake qiyaliklarida bo‘lgan kishilar ro‘yxatini tekshirish asosida aniqlanishicha, 16 kishi bedarak yo‘qolgan. Qutqaruv xizmatlari vakillari barcha turistlar ham vulqon tomon borishi haqida mahalliy hokimiyatga xabar bermasligi bois yo‘qolganlar soni keskin oshishi mumkinligini taxmin qilmoqda.

Shuningdek, qutqaruvchilar Ontake etagidagi avtomobil to‘xtash joyida qolgan 20 ta avtomobil egalari bilan hozirga qadar bog‘lana olmadi.

Eslatib o‘tamiz, Yaponiya poytaxti Tokiodan 200 kilometr va yirik markaziy shahar Nagoyadan 100 kilometr shimoli-sharqda joylashgan Ontake vulqoni 27-sentabr, shanba kuni tongda otila boshladi.