O‘zbekiston ingliz tili o‘qituvchilari uyushmasi (UzTEA)ning “Yosh yetakchilarni qo‘llab-quvvatlash loyihasi” (YLDP) axborot-resurs markazida “Sardorlar suhbati” o‘quv klubining ochilish marosimi bo‘lib o‘tdi.
Jahon iqtisodiyoti va diplomatiya universitetida joylashgan UzTEA kutubxonasining anjumanlar zalida bo‘lib o‘tgan tadbirda UzTEA raisi Feruza Rashidova, Respublika chet tili o‘qitish markazi direktori Mirabbos Irisqulov, AQShning O‘zbekistondagi elchisi o‘rinbosari Laura Trevis hamda uyushma fidoyilari, hamkor tashkilot vakillari, faol yoshlar ishtirok etdi.
“Marosimni o‘tkazishdan maqsadimiz faol yoshlarning ijodiy salohiyatini yuzaga chiqarish, ularning g‘oya va maqsadlarini qo‘llab-quvvatlash, ularni erkin fikrlashga, mulohaza qilishga, yetakchiga xos bo‘lgan xususuyatlarini yana ham kuchliroq shakllantirishga o‘rgatishdir.
Bundan tashqari, biz bugun yangi bir ‘Sardorlar suhbati’ nomli klub taqdimotini ham o‘tkazdik. Ushbu klubimiz ham bizda ilgaridan mavjud bo‘lgan ‘Muammolar yechimi’, ‘Musiqiy klub’, ‘Kinoklub’, ‘Kitobxon klubi’ hamda ‘Matematika klubi’ singari faqat va faqat ingliz tilida olib boriladi va yoshlarning yuqorida sanab o‘tilgan xususiyatlarini rivojlantirishga xizmat qiladi”, — dedi YLDP koordinatori Zamira Akramova.
Tadbir doirasida AQSh elchixonasi YLDP loyihasi uchun ajratgan o‘quv adabiyotlari va badiiy asarlar jamlanmasi ko‘rinishidagi xayriya grantini taqdim etdi. Shuningdek, YLDPning yosh notiqlari tomonidan O‘zbekiston va jahon sardorlari hayoti va faoliyatiga bag‘ishlangan interfaol taqdimot ham tashkil etilib, unda Mirjalol Mirsabitov, Najiba Hazratqulova, Bilol Yo‘ldoshev hamda Saidaziz A’zamov o‘z nutq va taqdimotlari bilan ishtirok etdi.
“Biz tadbir doirasida o‘tkazgan interfaol taqdimotimiz orqali yoshlarni yangi tashabbuslar qilishga, o‘zlarining yetakchilik qobiliyatlarini namoyish etishga, g‘oyalari bilan jamiyatga manfaat keltirishga undadik, deb o‘ylayman. Bugun ochilgan yangi klubimizda biz o‘z tengdoshlarimizni YLDP g‘oyalari bilan tanishtirish, ulardagi chet tilida so‘zlashish qobiliyatini rivojlantirish, jamiyat hayotida faol bo‘lishga intilish hosil qilishga harakat qilamiz. Bugun biz ham o‘z taqdimotimizda dunyo va yurtimizda ulkan ma’naviy ishlarni amalga oshirgan shaxslardan ayrimlarining hayot yo‘lini yoshlarga tanishtirish bilan ularda o‘sha shaxslarga nisbatan hurmat, ularning mavqeyiga intilish, ularga havas qilgan holda yana ham kuchliroq bilim olishga intilish kabi maqsadlarni paydo qilishga harakat qildik va bunga qaysidir jihatdan erisha oldik, deb o‘ylaymiz”, — dedi YLDP yosh yetakchisi Bilol Yo‘ldoshev.
Tadbir so‘nggida tashkilotchilar qatnashchilar uchun aqliy mashg‘ulotlar, viktorinalar uyushtirib, g‘oliblarga esdalik sovg‘alari taqdim etdi.
Izoh (0)