O‘zbekiston terma jamoasi Osiyo o‘yinlarida o‘z oldiga qo‘yilgan vazifani bajara olmadi. Terma jamoa alamli mag‘lubiyatga uchradi. Bosh murabbiy Mirjalol Qosimov mazkur uchrashuv haqidagi fikrlari bilan o‘rtoqlashdi, deb xabar bermoqda Uff.uz.

Aslida Mirjalol Qosimov shogirdlari Saudiya Arabistoniga qarshi kechgan uchrashuvda yomon o‘ynamadi. O‘yin, tashabbus, golli vaziyatlar — hammasi o‘z o‘rnida bo‘ldi. Biroq omad O‘zbekiston futbolchilari tomonda bo‘lmadi.

“Saudiya Arabistoniga qarshi kechgan uchrashuvdagi mag‘lubiyat ikki hissa alamli, — dedi Mirjalol Qosimov. — Bu uchrashuvda jamoamiz yomon o‘yin ko‘rsatmadi, tashabbusga egalik qildik, gollar kiritdik. Ammo o‘zimiz kutmagan tomondan muammolar kelib chiqdi. Penaltidan gol o‘tkazib yubordik, aslida hakam o‘sha penaltini qo‘ymasligi ham mumkin edi. Vaziyat penaltiga tortadigan emasdi. Keyin o‘z darvozamizga gol kiritib qo‘ydik. Kamiga so‘nggi daqiqalardagi jarima to‘pi. Balki raqib shunaqa jarima to‘plarining yana o‘ntasidan foydalana olmasligi mumkin, lekin o‘sha vaziyatda gol ura oldi.

Men uchun hammadan ham alamlisi — jamoadagi ishtiyoqni yuzaga chiqara olmaganimiz bo‘ldi. Barcha futbolchilar bir maqsad yo‘lida birlashgan edi. Hamma g‘alaba qozonishimizga ishonardi. Bir necha daqiqa ichida barchasi o‘zgarib ketdi. O‘yin tugaganidan so‘ng ko‘p futbolchilar yig‘ladi. Ularga nima deb tasalli berishni ham bilmaysan. Mana shunisi alam qiladi. Yaxshi o‘ynaganimiz, qilingan mehnat, urilgan gollar behuda ketgani o‘z yo‘liga, hammasidan ham ishonganimizni ro‘yobga chiqara olmaganimiz og‘ir bo‘ldi. Biz bu o‘yinda yengsak bo‘lardi. Buning uchun kerak bo‘lgan hamma narsa bor edi. Ammo mag‘lubiyatga uchradik. Demak ayb o‘zimizda: qayerdadir xato qilganmiz”.

Mirjalol Qosimov Bobur Yo‘ldoshevning avtogoli haqida fikr bildirar ekan, bunaqasi har qanday futbolchi bilan sodir bo‘lishi mumkinligini qayd etdi: “Men Boburni nafaqat yaxshi futbolchi, balki yaxshi inson deb bilaman. Avtogol esa futbol o‘ynaydigan har qanday odam bilan ro‘y berishi mumkin. Biz Boburni ayblamaymiz, shundoq ham uning ahvoli ancha og‘ir. Jamoamizdagi har bir inson uni to‘g‘ri tushunadi. Chetdan kimdir uning ustidan kulgan, mazax qilgan bo‘lishi mumkin, ammo biz u qanday holatda ekanini yaxshi bilamiz. Shu bilan birga, muxlislarni ham tushunsa bo‘ladi. Ular jamoadan g‘alaba kutgan edi. Ularning ishonchini oqlay olmaganimiz uchun uzr so‘raymiz. Ammo hamma aybni Bobur Yo‘ldoshevga yuklab, unga nisbatan turli gaplar aytilishiga qarshiman. Hozir hammadan ham Boburga og‘ir. U mana shu og‘ir vaziyatdan o‘tib olishi kerak. Futbolda shunaqasi ham uchrab turadi. Dunyo tan olgan yulduzlar ham avtogol kiritgan vaqtlar bo‘lgan”.

Bosh murabbiy o‘z intervyusida Davron Hoshimovning bir kun oldin mashg‘ulot vaqtida to‘qnashib ketib, oyog‘ini biroz shikastlab olgani uchun maydonga tusha olmaganini ma’lum qildi. “Uni asrashga qaror qildik. Saudiya Arabistoni tarkibida 8 va 11-raqamli futbolchilar texnik jihatdan ancha kuchli edi. Bobur esa Afg‘onistonga qarshi yaxshi o‘yin ko‘rsatgandi, shu sababli unga yana bir imkon berdik. Buni taqdir, peshona deyishadi. Bo‘lishi shart ekan, bo‘ldi. Davron bilan ham shunday bo‘lishi mumkin edi”.

Mirjalol Qosimov uchrashuvning bunday natija bilan yakunlanishi terma jamoa tanlagan hujumkor o‘yin ko‘rsatishning kelajakda himoya taktikasi bilan o‘zgartirilmasligini ta’kidladi. “Bundan keyin ham hujumkor o‘yinga urg‘u berishda davom etamiz. Ammo bu — raqib kim bo‘lishidan qat’iy nazar, har bir o‘yin faqat hujum ostida o‘tadi, degani emas. Hamma jamoa­ga qarshi bir xil uslubda o‘ynab bo‘lmaydi. Taktika, eng avvalo, o‘z jamoangdagi futbolchilardan, keyin esa raqib kimligidan kelib chiqib tanlanadi. Hujumkor o‘yin uchun yetarli bo‘lgan futbolchilar bor ekan va raqib ham bunga imkon berar ekan, nima uchun hujum qilmaslik kerak? Ammo, shu bilan birga, ba’zi jamoalarga qarshi bosh­qacha taktika tanlashga to‘g‘ri keladi. Biz har bir o‘yinga individual yondashamiz va o‘yin uslubini turli jihatlardan kelib chiqib tanlaymiz. Futbolda natija birinchi o‘rinda turadi. Biz buni unutmagan holda, eng avvalo, o‘sha natijaga hujumkor futbol orqali erishishga harakat qilamiz”, — dedi bosh murabbiy.

Mirjalol Qosimov Yangi Zelandiyaga qarshi kechgan uchrashuvda ajo­yib futbol namoyish qilgan terma jamoa haqida fikr bildirib, muvaffaqiyat sirlarini ochdi: “O‘sha uchrashuvda terma jamoani to‘liq tarkibda yig‘ishga muvaffaq bo‘lgandik. Tayyorgarlik ham shunga yarasha sentabrdan boshlandi. Yig‘in davomida o‘yin uslubini yo‘lga qo‘ydik, futbolchilar bilan ishladik. O‘sha tarkib anchadan buyon yig‘ilmagandi, shu sababli o‘yinga ishtiyoq yuqori darajada edi. Buning ustiga deyarli hamma futbolchilar yaxshi formada bo‘lib turgandi. Shularning barchasi bir bo‘lib, yaxshi o‘yin ko‘rsatishimizga sabab bo‘ldi. Nasib qilsa, Osiyo kubogiga ham kuchli tayyorgarlik ko‘rsak, kutilgan o‘yinni namoyish qila olamiz”.

Murabbiy kutilmagan biror narsa ro‘y bermasa, mo‘ljallangan futbolchilarning barchasi Osiyo kubogida ishtirok etishi lozimligini ta’kidladi: “Nasib qilsa, bu borada hech qanday muammo bo‘lmaydi. Shu bilan birga, futbolchilarning sport formasini ham yuqori holatga keltirishimiz kerak. Bu ham amalga oshirsa bo‘ladigan masala. O‘sha vaqtda ba’zi futbolchilar ishtirok etadigan chempionatda davralar oralig‘idagi tanaffus bo‘lsa, bosh­qalari uchun mavsum yakuniga yetgan bo‘ladi. Muhimi — futbolchilarni o‘z vaqtida yig‘ib olib, tayyorgarlik jarayonini to‘liq o‘tash. Shunda terma jamoa yuqori sport formasida musobaqaga yetib keladi. Hammasi rejadagidek ketsa, bunga erisha olamiz”.

Shuningdek, u oktabr oyida bo‘ladigan yig‘inga terma jamoaning barcha a’zolari yig‘inga chaqirilganini ma’lum qilib, “4 oktabrda BAAga yo‘l olamiz. Ba’zi futbolchilar Toshkentga yetib kelsa, boshqalari to‘g‘ri Dubayga uchadi. O‘sha yerda tarkibni to‘liq jamlaymiz. Terma jamoa BAA yig‘ini davomida uchta muhim o‘rtoqlik o‘yini o‘tkazadi. Mana shu uchrashuvlar davomida o‘yin uslubini imkon qadar shakl­lantirib olishimiz lozim. Qatar, Bahrayn va BAA — yaxshi raqib. Ularga qarshi kechadigan o‘yin­larda o‘ylab qo‘yilgan rejalarni qo‘llab ko‘ramiz”, — deya qo‘shimcha qildi.

“Osiyo o‘yinlaridagi muvaffaqiyatsizlik asosiy terma jamoaga ta’sir o‘tkazmaydi, deb aytish qiyin. O‘zbek futbolida hamma narsa bir-biri bilan chambarchas bog‘liq. Bir jamoaning mag‘lubiyati boshqasiga ta’sir o‘tkazishi mumkin yoki aksincha, birining muvaffaqiyati ikkinchisini ruhlantirishi turgan gap. Bizning vazifamiz — mana shu ta’sirni minimallashtirib, futbolchilarning ruhiyatini mustahkamlashdan iborat. Shukrki, asosiy jamoa safida bir qator tajribali futbolchilar to‘p suradi. Ular yoshlarga o‘rnak bo‘lib, dalda berishi turgan gap.

Tayyorgarlik ko‘rish uchun oldinda vaqt bor. Biz undan unumli foydalanishimiz kerak. Osiyo o‘yinlarida oldimizga qo‘yilgan vazifani bajara olmadik, ammo shu bilan birga yomon o‘yin ham ko‘rsatmadik. Mana shu boshlagan ishimizni oxiriga yetkazishimiz kerak. Hozir bizga juda og‘ir. Bunday mag‘lubiyatdan so‘ng darhol tiklanib olish qiyin. O‘zimizdan o‘tayotganini o‘zimiz bilamiz. Bizning hali isbotlaydigan narsamiz ko‘p. Muhimi — ortga chekinmaslik. Futbolda hech qachon hech narsani oldindan aytib bo‘lmaydi. Shunisi bilan ham u qiziq. Nima bo‘lganda ham, Osiyo kubogida muxlislarga yoqadigan, chiroyli futbol ko‘rsatishga harakat qilamiz”, — deya bosh murabbiy o‘z fikriga yakun yasadi.