AQShning mobil aloqa xavfsizligi texnologiyalariga ixtisoslashgan Lacoon Mobile Security firmasi ekspertlari Xitoy hukumati Gonkongdagi namoyish ishtirokchilarini kuzatish uchun smartfonlardagi zararli dasturlardan foydalanayotganini ma’lum qildi, deb xabar bermoqda “RIA Novosti”.

Dasturlar smartfon sohiblarining o‘zlari o‘rnatadigan vositalar ko‘rinishiga ega bo‘lib, yuklab olingach kontaktlar ro‘yxati, qo‘ng‘iroqlar jurnali va boshqa ma’lumotlarni serverga yetkazib bera boshlaydi. Xususan, kompaniya ikki kuchli dasturni aniqlagan bo‘lib, ularning biri Apple iOS, ikkinchisi Android operatsion tizimlarida ishlashga mo‘ljallangan.

Bu juda murakkab dastur, uning ishlatilishi orqasida davlat turgan bo‘lishi kerak, deb hisoblamoqda ekspertlar. Ularning fikricha, Xsser mRAT troyani kompyuter tizimlariga zarar yetkazishdan tortib mobil qurilmalarida ishlashgacha bo‘lgan vazifalarni bajara oladi.