Yaponiya Bosh vaziri Shinzo Abe Rossiya bilan dialogni faollashtirib, ikkala davlat o‘rtasidagi munosabatlarni milliy manfaatlar asosida qurishni istashini ma’lum qildi, deb xabar bermoqda “ITAR-TASS”.
“Rossiya bilan dialogni faollashtirmoqchimiz, jumladan noyabr oyida Pekinda bo‘lib o‘tadigan Osiyo-Tinch okeani iqtisodiy hamkorligi sammitida ikkala davlat yetakchilarining uchrashuvi ehtimoli ham bor. Biz yapon-rus munosabatlarini milliy manfaatlarimizga mos ravishda quramiz”, − dedi Abe.
Janubiy Kuril orollari masalasida Abe hukumatning avvalgi pozitsiyasini takrorladi: “Biz shimoldagi 4 orolga egalik qilish masalasini hal qilish va bu borada Rossiya bilan tinchlik shartnomasini tuzish uchun qattiq harakat qilamiz”.
26-sentabr kuni Rossiya prezidenti yordamchisi Yuriy Ushakov noyabr oyi o‘rtalarida Pekinda bo‘lib o‘tadigan Osiyo-Tinch okeani hamkorligi sammiti doirasida Yaponiya va Rossiya rahbarlari uchrashuvi tashkillashtirilishi mumkinligini ma’lum qilgan edi. Rossiya prezidentining Yaponiyaga tashrifi to‘g‘risida berilgan savolga Ushakov tashrifning qachon tashkillashtirilishi diplomatik kanallar orqali hali kelishilmagan, deb javob qaytargan.
Izoh (0)