Shimoliy Koreya davlat televideniyesi mamlakatning 31 yoshli rahbari “noqulay jismoniy holat”ni boshidan kechirayotganini ma’lum qilgan, ammo bunday holning sababi oshkor qilinmagan, deb xabar bermoqda AP.

Kim sulolasining uchinchi vakili uch haftadirki ommaga ko‘rinmayapti. Kim Chen In Shimoliy Koreyaning oliy qonun chiqaruvchi va vakillik organi – Oliy xalq kengashi sessiyasida ham ishtirok etmagan. KXDR yetakchisining bu sessiyada qatnashmagani uning sog‘ligi borasidagi navbatdagi mish-mishlar tarqalishiga sabab bo‘lgan. Payshanba oqshomida esa mamlakat televideniyesida namoyish etilgan Kim Chen Inning doimiy tekshiruv tashriflaridan biri haqidagi hujjatli kadrda yetakchining cho‘loqlanayotgani ko‘rinib turgan.

Kimning zavodlar va harbiy garnizonlarga bu yilgi tashriflarining rasmiy videoyozuvlarida ortiqcha vazndan aziyat chekayotgani bilinib turgan KXDR yetakchisining biroz oqsoqlanib yurganini sezish mumkin. Rahbarning keng shimlari ham yurishning notekisligini bildirmaslik uchun maxsus tikilgani aytilmoqda.

Janubiy Koreya matbuoti esa Kim Chen In sportda orttirilgan jarohat yoki nasliy kasalliklardan biri bilan og‘rigani haqidagi taxminlarni ilgari surgan.