Stadion.uz veb-sayti bugundan boshlab o‘zbek futboliga nisbatan boykot e’lon qilganini ma’lum qildi.
Sayt tahririyati o‘zining mazkur qarorini quyidagicha izohladi:
“Xabaringiz bor, so‘nggi yillarda o‘zbek futbolida yana keskin pasayish boshlandi. Terma jamoalarimizning xalqaro o‘yinlardagi natijalari yomonlashib bormoqda. O‘smirlarimiz JChga chiqa olmadi, terma jamoamiz Osiyo o‘yinlarida nimchorak finaldan nariga o‘ta olmadi.
O‘zbekiston milliy terma jamoasi hozircha legionerlar hisobiga o‘z saviyasini nisbatan ushlab turibdi. Bosh jamoamizning Osiyo kubogi — 2015’da qanday natija qayd etishini hech kim ishonch bilan ayta olmaydi. Bularning barchasiga milliy chempionatimiz sababchi ekani hech kimga sir emas. Oliy va Birinchi liga musobaqasi botqoqqa botib yotibdi. Kelishilgan o‘yinlar va totalizatorga o‘yinlarni tikish kundan-kunga avj olib bormoqda. Hammayoq ‘teatr’. Ayniqsa, mavsumning so‘ngida bu holat juda ham avj oladi. Medallar uchun kurashayotgan va Oliy ligada qolishni istagan jamoalar tavakkal qilishni, mardlarcha kurashishni istamaydi. Kelishadi, sotib oladi, kerak bo‘lsa, hakamlar bilan ‘ishlaydi’.
Essiz davlat tomonidan ajratilayotgan shuncha pullar, essiz yaratilgan imkoniyatlar-u qurilgan stadionlar. Ayniqsa, muxlislarga juda achinib ketasan kishi. 5:4 hisobida o‘ynasa, muxlislar gollardan olam-olam quvonch oladi, deb fikrlaydigan, o‘zidan barchani ahmoq deb o‘ylaydigan ‘aqlli’ murabbiylarimiz bor.
Mana shunday ‘teatr’larda ‘pishayotgan’ futbolchilar terma jamoa safida sal bosimga duch kelsa, dovdirab qolyapti, oyog‘i qaltirayapti, yutqazyapti.
Katta maqsad yo‘lida tashkil etilgan saytlar, asosan, fidoyilik evaziga faoliyat yuritadi. Hamkasblarimiz o‘zbek futbolining yutug‘ini ko‘rishni istaydi. Biroq, ‘teatr’larni targ‘ib qilishni maqsad qilmagan.
‘Metallurg’ — ‘Buxoro’ (4:3) o‘yini Yevropa tahlil kompaniyasi tomonidan kelishilgan deb topilgandi. Ushbu o‘yin borasida FIFA O‘FFdan so‘rab-surishtirgani va O‘FF rahbariyati mazkur o‘yin haqiqatan ham kelishilgan bo‘lganini tan olganidan xabarimiz bor. Ammo O‘FF va O‘zPFL hamon ushbu o‘yin borasida jiddiy chorak ko‘rmadi. Natijada kelishilgan o‘yinlar ‘bolalamoqda’. Undan keyin bunday shubha ostiga ‘So‘g‘diyona’ — ‘Navbahor’ (5:4) o‘yini olindi. FIFA, O‘FF va barcha o‘zbek futboli jamoatchiligiga ‘tupurib’ qo‘yganini ko‘rsatib qo‘yish maqsadida jamoalarimiz yana bir 5:4 hisobni namoyish qilib berdi. Klublarimizda, murabbiylarimizda, futbolchilarimizda na or bor, na g‘urur!
Aslida muxlislarni, jurnalistlarni va futbol ommasini ovora qilib nima qilishadi? Hammani ovora qilmasdan futbolni qog‘ozda ‘o‘ynab’ qo‘ya qolsin. Axir barchasi oldindan ma’lum bo‘lsa?!
Biz, Stadion.uz sayti ijodkorlari, O‘FF tomonidan kelishilgan o‘yinlarga qarshi jiddiy kurash boshlanmagunicha, o‘zbek futboli iflosliklardan tozalanmagunicha, o‘zbek futbolini yoritmasligimizni ma’lum qilamiz. Bizga halol futbol kerak. Ungacha esa Yevropa va xalqaro futbol bilan yashaymiz.
Shuningdek, O‘FF prezidenti Mirabror Usmonov, O‘zPFL bosh direktori Farhod Magomedov, O‘FF qoshidagi kelishilgan o‘yinlarga qarshi kurash komissiyasi boshlig‘i Ahrol Inoyatovdan sport jurnalistlari bilan uchrashuv tashkil qilishlarini so‘raymiz. Kelishilgan o‘yinlarga qarshi biz kutgan kurash boshlanmasa, bu borada FIFAga murojaat qilishga majbur bo‘lamiz. O‘lib borayotgan futbolimizning ahvoliga jim qarab tura olmaymiz!
Bundan tashqari, O‘zbekistonning barcha terma jamoalari bosh murabbiylari — Mirjalol Qosimov, Shuhrat Maqsudov, Ravshan Haydarov, Aleksandr Mochinov va boshqalarni bunday jirkanch illatga qarshi kurashishga chorlaymiz. Axir ular ham terma jamoaga yuksak kadrlar yetishib chiqishidan manfaatdor emasmi?!”
Izoh (0)