O‘zbekistonda “Tijorat siri to‘g‘risida”gi qonun kuchga kirdi

13-sentabr kuni O‘zbekistonda “Tijorat siri to‘g‘risida”gi qonun kuchga kirdi, deya xabar bermoqda Gazeta.uz.

Avvalroq 11-sentabrda hujjat O‘zbekiston Prezidenti Islom Karimov tomonidan imzolangan, 12-sentabrda esa “Narodnoye slovo” va “Xalq so‘zi” gazetalarida chop etilgan edi.

Qonun 18-iyunda Oliy Majlisning Qonunchilik palatasi tomonidan qabul qilingan va 28-avgustda Senat tomonidan ma’qullangan.

Qonunga muvofiq, tijorat siri – ilmiy-texnika, texnologiya, ishlab chiqarish, moliyaviy-iqtisodiy va boshqa sohalarda uchinchi shaxslarga ma’lum bo‘lmaganligi sababli tijorat qadriga ega bo‘lgan, erkin foydalanish huquqi mavjud bo‘lmagan, qonun asosida foydalaniladigan va mulkdor uning maxfiyligini himoya qilish bo’yicha choralar ko‘radigan axborotdir.

“Tijorat sirining mulkdori – tijorat siriga egalik qilish, undan foydalanish va uni tasarruf etishni amalga oshiruvchi va unga nisbatan tijorat siri rejimini o‘rnatgan yuridik yoki jismoniy shaxs. Mulkdordan shartnoma asosida tijorat sirini egalik qilish va foydalanishga olgan yuridik yoki jismoniy shaxs konfident hisoblanadi”, — deyiladi hujjatda.

Qonunda shuningdek maxfiylik va tijorat siri rejimi, erkin foydalanish huquqi, tijorat siridan foydalanishga ruxsat va uni oshkor qilish tushunchalariga ham aniq ta’riflar berilgan.