2014-yil 29-avgust kuni Toshkent shahrida O‘zbekiston Respublikasi Oliy Majlisi Senatining o‘n beshinchi yalpi majlisi o‘z ishini davom ettirdi. Bu haqda Oliy Majlisi Senatining axborot xizmatiga tayanib, O‘zbekiston Milliy axborot agentligi xabar bermoqda.
Senatorlar yalpi majlisning ikkinchi kunini Toshkent shahar Hamza tumanining nomini o‘zgartirish to‘g‘risidagi masalani muhokama qilishdan boshladi. Ushbu masala O‘zbekiston Respublikasi Vazirlar Mahkamasi tomonidan “Geografik obyektlarning nomlari to‘g‘risida”gi O‘zbekiston Respublikasi qonuniga muvofiq tayyorlanganligi va kiritilganligi ko‘rsatib o‘tildi.
Senatorlar masalani har tomonlama muhokama qilganlaridan keyin hukumat taklifi, keng jamoatchilik muhokamasi jarayonida bildirilgan fikr va takliflarni umumlashtirish materiallari, geografik obyektlarga nom berish va ularning nomini o‘zgartirish masalalari bo‘yicha hududiy va respublika komissiyalari tomonidan tayyorlangan xulosalar asosida Toshkent shahar Hamza tumanining nomini Yashnobod tumani deb o‘zgartirish to‘g‘risida qaror qabul qildi.
Shundan keyin senatorlar O‘zbekiston Respublikasining bir qator chet davlatlardagi diplomatiya vakolatxonalari boshliqlarini tayinlash va lavozimidan ozod qilish to‘g‘risidagi masalalarni, shuningdek, O‘zbekiston Respublikasi Oliy Majlisi Senati vakolatlariga kiritilgan boshqa masalalarni ko‘rib chiqdi.
Senatorlar ko‘rib chiqilgan masalalar yuzasidan tegishli qarorlar qabul qildi.
Mustaqillikning yigirma uch yilligi arafasida bo‘lib o‘tgan ikki kunlik yalpi majlis davomida senatorlar 15 ta masalani, shu jumladan, to‘rtta qonunni ko‘rib chiqdi.
Izoh (0)