O‘zbekistonlik aktyor Otabek Mahkamov Toshkentdagi erkaklar Nogironlar uyiga yuzga yaqin nomdagi kitoblarni taqdim etdi, deya xabar berdi “Noviy vek”.
Aktyorning nashrga ma’lum qilishicha, avvalroq boshqa mashhur ijodkorlar bilan ushbu muassasaga xayriya konserti berish maqsadida kelganida, bemorlardan biri, Nodir ismli yosh yigit ingliz tilini o‘rganmoqchi ekanini aytib, o‘quv qo‘llanmasi olib kelishni so‘ragan.
Shundan so‘ng aktyor boshqa bemorlar o‘rtasida ham so‘rov o‘tkazib, ularning juda ko‘pchiligi ingliz tilini o‘rganish istagida ekanini aniqladi. Aktyor va huquqshunos bo‘lishdan tashqari, ingliz tilidan dars beradigan Otabek Mahkamov tegishli daraja va bosqichlarni nazarda tutib, zarur adabiyotlar ro‘yxatini tuzadi.
“Ularning barchasini sotib olib, 27-avgust kuni Nogironlar uyi bemorlariga tarqatdim”, — dedi u. Aktyorning so‘zlariga ko‘ra, u o‘z tug‘ilgan kunini nishonlashga sarflamoqchi bo‘lgan mablag‘ni ushbu xayriya uchun ishlatgan.
“Ularning xursandchiligini tasavvur qila olmaysiz. Yaratganga shukronalar aytib turishimiz va bu aziz kishilarni unutmasligimiz kerakligiga yana bir bora amin bo‘ldim”, — deya o‘z ishini izohladi aktyor.
Otabek Mahkamov 1984-yil 5-sentabrda Farg‘ona viloyatida tug‘ilgan. U huquqshunoslik mutaxassisligi bo‘yicha o‘qigan. Ayni paytda u aktyorlik qilish bilan birga, O‘zbekiston Hisobchilar va auditorlar milliy uyushmasida dars beradi.
Aktyor “Majruh” (2011), “Men yulduzman” (2012), “Jodugar” (2012), “Yondiradi, kuydiradi” (2012), “Fotima” (2013) kabi filmlardagi rollari orqali tanilgan.
Izoh (0)