Tayvan oroli janubi-g‘arbidagi Gaosyun shahrida 31-iyul kuni mahalliy vaqt bo‘yicha 21:00 (Toshkent vaqti bilan 18:00)da gaz sizib chiqishi natijasida yerosti portlashlar sodir bo‘ldi. Bu haqda Lifenews xabar berdi.
Portlashlardan 270 ga yaqin kishi jarohatlandi, kamida 22 kishi halok bo‘ldi. Mahalliy OAVlarning qayd etishicha, qurbonlar soni ortib bormoqda.
Orol-davlatning Bosh vaziri Szyan Ixuaning ma’lum qilishicha, 2,8 million odam istiqomat qiladigan shaharda beshdan ziyod yerosti portlashi kuzatilgan. Natijada yo‘l qoplami buzilib, avtomobillar ag‘darilib ketgan. Bir portlashdan so‘ng hosil bo‘lgan alanga to‘qqiz metrgacha ko‘tarilgan. Shaharda tarqala boshlagan olovlarni o‘chirish vaqtida besh kishi halok bo‘lgan.
Taxminlarga ko‘ra, portlashga kanalizatsiya tizimi yaqinida joylashgan gaz quvuridagi avariya sabab bo‘lgan.
Bosh vazirning so‘zlariga ko‘ra, favqulodda hodisa kislorod bilan portlovchi aralashma hosil qiladigan propilen natijasida sodir bo‘lgani uchun o‘t o‘chiruvchilar olovni suv bilan o‘chira olmagan va gaz yonib bo‘lishini kutishga majbur bo‘lgan.
Gazning tarqalishini to‘xtatishning hozircha ilojisi bo‘lmadi.
Izoh (0)