16-iyul, chorshanba kuni Gaaga sudi 1995-yili Bosniya va Gersegovina sharqida joylashgan Srebrenitsa shahridagi qirg‘in oqibatida halok bo‘lgan 8000 kishidan 300 tasining o‘limiga Gollandiyani javobgar deb topdi. Mazkur voqelik Ikkinchi jahon urushidan keyin Yevropa tarixida sodir bo‘lgan eng katta fojea bo‘lib, unga Gollandiya hukumati qisman aybdor deb topildi. Bu haqda Euronews xabar qildi.
Gaaga sudining qayd etishicha, Serbiya va Bosniya o‘rtasida sodir bo‘lgan mojarodan qochish niyatida 300 nafar boshpana so‘ragan bosniyalik musulmonlarni Srebrenitsada joylashgan Gollandiya bazasidan chiqarib yuborish ularni qatlga mahkum etish bilan barobar ekanligini Gollandiyaning tinchlikparvar kuchlari anglashlari kerak edi.
Sudning ta’kidlashicha, Gollandiya Srebrenitsa atrofidagi o‘rmonga qochgan erkak va o‘smirlarning o‘limiga javobgar emas.
Qayd etilishicha, ushbu hukm kelajakda sodir bo‘ladigan shunga o‘xshash holatlarda tinchlikparvar kuchlar tog‘ri qaror qabul qilishga xizmat qiladi.
Eslatib o‘tamiz, uch yil davom etgan Bosniya urushida 100 000 dan ortiq kishi halok bo‘lgan. Bu urush Yugoslaviyaning parchalanishi paytida sodir bo‘lgan eng qonli urushdir.
Izoh (0)