1994-yil 16-oktabr Xirosimadagi “Big Arch” stadionida bo‘lib o‘tgan 12-Osiyo o‘yinlarining final bosqichida O‘zbekiston Xitoyni mag‘lubiyatga uchratgan edi. Mirjalol Qosimov “Olam Sport” nashriga bergan intervyusida hozirga qadar yagonalikni saqlab kelayotgan aynan shu tarixiy g‘alaba haqida gapirdi.

Mirjalol Qosimov: Osiyo o‘yinlarida erishilgan yutuqning salmog‘i, uning mohiyati qanchalik yuqori ekanligini endi tushunib yetyapmiz. Bu mustaqillik yillarida erishilgan dastlabki katta yutuq edi. Haqiqatan ham, tarkibimiz juda ham kuchli, shu bilan birga ahil bo‘lgan. G‘alabaning kaliti ham shunda bo‘lsa kerak. Qolaversa, stadiondagi muxlislarning qo‘llab-quvvatlashi ham kuchimizga kuch, g‘ayratimizga g‘ayrat qo‘shgan.

— Terma jamoamiz muvaffaqiyatida murabbiylarning hissasi qay darajada bo‘lgan?

Mirjalol Qosimov: Terma jamoaga Rustam Akramov va Birodar Abduraimov birgalikda ustozlik qilishgan. Har bir raqib jiddiy tarzda o‘rganilgan. Nazariy mashg‘ulotlarda bizga raqib haqida ma’lumotlar, tegishli ko‘rsatmalarni berib borishgan. O‘ylaymanki, bu ikki zabardast murabbiyimizning ham tarixiy g‘alabaning qo‘lga kiritilishida hissalari katta bo‘lgan.

— Yarim final bu alohida mavzu. Koreyslarga qarshi kechgan o‘yinni o‘sha paytda finalga qiyoslashgan ekan...

Mirjalol Qosimov: Haqiqatan ham, o‘sha uchrashuvda koreyalik futbolchilar juda kuchli o‘yin namoyish etgandi. Darvozamiz oldida tinimsiz xavfli vaziyatlarni yuzaga keltirishgan, Sheykin jamoamizni bir necha bor muqarrar gollardan qutqarib qolgan edi. Yura “Darvozabon — yarim jamoa” degan iborani yuz foiz oqlagan. Biz, asosan, qarshi hujum taktikasida harakat qilgandik. Chunki ochiq futbol namoyish eta olmasdik.

— Oradan 20 yil o‘tib, endi bosh murabbiy sifatida terma jamoani Osiyo o‘yinlariga boshlab borasiz. Bilishimizcha, terma jamoa oldiga katta vazifalar qo‘yilyapti. Musobaqaga esa oz fursat qoldi. Yakuniy tayyorgarlik rejasi ishlab chiqilganmi?

Mirjalol Qosimov: Haqiqatan ham juda qiziq holat. Ham futbolchi, ham murabbiy sifatida Osiyo o‘yinlarida g‘olib bo‘lish imkoniyati mavjud, deya olaman. Tayyorgarlik 20-iyuldan boshlanadi. Toshkentda o‘tkaziladigan bir haftalik o‘quv-mashg‘ulot yig‘iniga 1991—93-yillarda tug‘ilgan futbolchilar taklif etilgan. Shuningdek, yana uch nafar yoshi katta futbolchini ham tarkibga kiritishim mumkin. Yig‘in doirasida mahalliy jamoalarimiz bilan nazorat uchrashuvlari o‘tkazish rejalashtirilgan. Albatta, har bir terma jamoa a’zosining oliy maqsadi ushbu Osiyo o‘yinlarida zafar quchish. Federatsiyamiz rahbariyati ham terma jamoa oldiga chempion bo‘lish vazifasini qo‘ygan. O‘ylaymanki, bu vazifani bajarib, ona Vatanga yorug‘ yuz bilan qaytamiz.

— Sentabr oyida o‘tkaziladigan 17-Osiyo o‘yinlari FIFA taqvimidan joy olmagan. Bu esa futbolchilarni terma jamoaga uzoq muddatga taklif qilishingizda muammolarni yuzaga keltirishi mumkin. Bu masalani qanday hal qilmoqchisiz?

Mirjalol Qosimov: To‘g‘ri ta’kidladingiz, biz hamisha FIFA taqvimi bo‘yicha muammolarga duch kelganmiz. Bo‘lajak Osiyo o‘yinlari ham bundan mustasno bo‘lmaydi. Shuni to‘g‘ri anglagan holda asosiy urg‘uni oliy ligamizda o‘ynayotgan o‘yinchilarga beramiz. Aziz Haydarov, Vitaliy Denisov, Odil Ahmedov kabi legioner futbolchilarimizni o‘z klublari bunday uzoq muddatga qo‘yib yubormaydi. Shunday bo‘lsa-da, avvalo, futbolchining o‘zi, keyin esa klub rahbarlari bilan gaplashib ko‘ramiz.

— Tarkibga jalb qilinishi mumkin bo‘lgan yoshi katta uch nafar futbolchi masalasida bir to‘xtamga keldingizmi?

Mirjalol Qosimov: Milliy chempionatimizning birinchi davrasi yakunlandi. Nomzod futbolchilarni kuzatib bordim. 20—28-iyul kunlariga belgilangan yig‘inimizni yakunlab olgach, murabbiylar shtabi bilan birga bu masalada bosh qotiramiz. Nomzodlar yetarli. Uch nafar yoshi katta futbolchini avgust oyida o‘tkazadigan yig‘inimiz chog‘ida aniqlab olamiz.

— Siz parallel ravishda milliy terma jamoada ham faoliyat yuritasiz. Tabiiyki, ayrim yig‘inlar deyarli bir xil vaqtga to‘g‘ri kelib qolishi mumkin. Bu masalaning yechimini qanday topmoqchi bo‘lyapsiz?

Mirjalol Qosimov: Milliy terma jamoani ham yoddan chiqarmaslik lozim. Har oyda yig‘in o‘tkazish tasdiqlangan. Avgust, sentabr va oktabr oylariga o‘rtoqlik uchrashuvlari belgilangan. Osiyo o‘yinlarida qatnashadigan futbolchilarning katta qismi milliy terma jamoada ham o‘ynaydi. O‘ylashimcha, bu borada muammo bo‘lmaydi. Osiyo o‘yinlari ham biz uchun muhim. 1994-yilgi muvaffaqiyatni takrorlash uchun astoydil harakat qilamiz. Bugunga kelib shakllangan terma jamoa bu vazifani uddalashga qodir. Incheonda o‘tkaziladigan 17-Osiyo o‘yinlarida chempionlikdan o‘zga natija bizni qoniqtirmaydi.