Ko‘plab davlatlar o‘z fuqarolarini internet orqali kuzatayotganini sir saqlamoqda, deb aytdi BMTning inson huquqlari bo‘yicha komissari Navi Pilley shaxsiy hayot daxlsizligiga bag‘ishlangan nutqida. Bu haqda “Rossiyskaya Gazeta” xabar berdi.

BMT mutaxassislari bir yildan ko‘proq muddat davomida ma’lum bir davlat hududi va uning tashqarisidagi elektron xabarlarni kuzatish va shaxsiy ma’lumotlarni yig‘ish uchun raqamli texnologiyalardan foydalanganlar haqida axborot yig‘di. Ko‘p davlatlarning tegishli organlari barcha kerakli ma’lumotlarni xususiy kompaniyalar hamda Internet provayderlaridan olayotgani va bu harakat foydalanuvchilarning o‘zidan sir saqlanayotgani aniqlandi.

O‘zaro aloqaga doir har qanday ma’lumotni yig‘ish shaxsiy hayotga aralashuv ekanligini qayd etib, “Ommaviy kuzatish favqulodda chora emas, balki xavfli odatga aylanmoqda”, — deb ta’kidladi Navi Pilley.

Shuningdek, nutqda ko‘plab mamlakatlarda kuzatuv ishlari qonun bilan nazorat qilinmayotgani, bu esa shaxsiy hayotga aralashuvning ko‘payishiga xizmat qilishi haqida aytib o‘tildi.

Eslatib o‘tamiz, Inson huquqlari umumjahon deklaratsiyasi hamda Fuqarolik va siyosiy huquqlar to‘g‘risidagi pakt kabi xalqaro shartnomalarda hech kimning shaxsiy hayotiga aralashish mumkin emasligi qayd etilgan. Bundan tashqari, BMTning 2013-yildagi Bosh Assambleyasida insonning real hayotdagi haq-huquqlari internet olamida ham amal qilishi to‘g‘risidagi rezolyutsiya qabul qilingan.