13-iyul kuni tongda KXDR Yapon dengizi tomonga kichik masofali ikki raketa uchirdi. Raketalar 500 kilometr masofaga uchgani taxmin qilinmoqda. Bu haqda Yaponiya hukumatining axborotiga asoslanib, “ITAR-TASS” xabar berdi.
Tinmay davom etayotgan raketalar hujumi borasida Yaponiyaning Pekindagi diplomatik vakolatxonasi Pxenyanga norozilik notasi yubordi.
Yaponiya bosh vaziri Sindzo Abe tegishli muassasalarga hamkorlik qilmoqchi bo‘lgan barcha mamlakatlar, xususan, AQSh va Janubiy Koreya bilan birgalikda raketalar haqida kerakli ma’lumot to‘plashni tashkillashtirish vazifasini yukladi.
Yaponiya hukumati rahbari raketalar uchirilgan vaqtda shu hududda bo‘lgan barcha havo va dengiz kemalarining xavfsizligini tasdiqlash, shuningdek, aholiga hodisa haqida tezkor holis ma’lumot yetkazishni topshirdi.
Eslatib o‘tamiz, 9-iyul kuni KXDR Yapon dengizi tomonga kichik masofali ikki ballistik raketa uchirgan edi. 3-iyulda esa KXDR hukumati mamlakatning shimoli-sharqiy qismida joylashgan Pxungeri poligonida olib borilayotgan faoliyatni to‘xtatib, u yerdagi barcha uskunalarni olib tashlagani xabar qilingan.