Dunyoning eng boy kishilari ro‘yxatidan joy olgan uch milliarder migratsiya islohotini amalga oshira olmagan AQSh Kongressiga qarshi birlashdi va bu norozilik borasida New York Times nashrida maqola chop etdi. Bu haqda “RIA Novosti” xabar berdi.
Bill Geyts, Uorren Baffet hamda Sheldon Adelson maqolada amerikalik qonun chiqaruvchilarni murosaga kela olmayotganlikda va fuqarolar hayotini xavf ostiga qo‘yayotganlikda ayblab, “Amerika bundan yaxshirog‘iga loyiq”, — deya qayd etdi.
Milliarderlar ayni damda yuzaga kelgan mushkul vaziyatda mamlakat manfaatlaridan kelib chiqib, ish olib borish o‘rniga muxolifatga qarshilik ko‘rsatishga ko‘proq kuch sarflanayotgani, bu esa amerikaliklar va deyarli barcha kompaniyalar rahbarlarining faoliyatini qiyinlashtirayotganini ta’kidladi.
Geyts, Baffet va Adelsonning aytishicha, ko‘pchilik amerikaliklar muhojirlarni ham, fuqarolarni ham qoniqtiradigan migratsiya qonun loyihasini ishlab chiqish AQSh manfaatlariga mos degan fikrda, negaki hozirda Amerika siyosati bu ikki guruh vakillarini himoya qilishda omadsizlikka uchramoqda.
Milliarderlar New York Times’da qayd etganidek, ularning siyosiy qarashlari turlicha: Geyts va Baffet Obamani qo‘llab-quvvatlagan bir vaqtda Adelson uning 2012-yilda qayta saylanmasligi uchun 100 million dollar sarf qilgan.
Yana bir amerikalik milliarder — Donald Tramp ham shu mavzuga oid xabarda Meksika chegarasidagi muhojirlar muammosini oson hal qilish mumkinligini yozgan. U Obamaning bu muammoga befarq qarayotganini qayd etib, “O‘z chegarasini himoya qila olmaydigan mamlakat uzoqqa bormaydi”, — deb ta’kidlagan.
Izoh (0)