Germaniya terma jamoasi Jahon chempionati chorak finalida Fransiyani minimal hisobda mag‘lub etdi va yarim final yo‘llanmasini qo‘lga kiritdi. Desham shogirdlari tartibli nemislarga qarshi hech narsa qila olmadi.
Germaniya o‘yinning 13-daqiqasida “standart”dan hisobni ochdi. Toni Kroos jarima to‘pni raqib darvozabon maydonchasi tomon yetkazdi va Mats Xummels bosh bilan darvozani ishg‘ol qildi. To‘p avval darvoza to‘siniga tegib, keyin to‘rga borib tushdi.
Nemislar bu o‘yinda umuman ortiqcha tavakkal qilishmadi. To‘pni nazorat qilishdi, payt poylashdi va imkon bo‘lgan paytda oldinga o‘tishdi. Fransiya esa butun o‘yin davomida yaqqol golga tortadigan vaziyat yarata olmadi. To‘g‘ri, Desham shogirdlari Germaniya darvozasi tomon zarbaar berishdi. Ammo u zarbalarning barchasini Noyer bartaraf etdi. Ayniqsa, uchrashuvga qo‘shib berilgan 4 daqiqaning so‘ngisida Benzemaning yaqin masofadan yo‘llagan zarbasini Manuel qaytardi va jamoasining g‘alabasini saqlab qoldi.
Yoaxim Lyov shogirdlari o‘yin taqdirini ertaroq hal qilib qo‘yishlari mumkin edi. Ammo zaxiradan tushgan Andre Shyurrle ikki marta juda qulay vaziyatdan foydalana olmadi.
Shu tariqa, Germaniya terma jamoasi birinchi bo‘lib yarim final yo‘llanmasiga ega bo‘ldi va chempionlik uchun kurashni davom ettiradi. O‘tgan JChda guruhdan chiqa olmagan Fransiya esa bu safar chorak finaldan ortga qaytadigan bo‘ldi.
Izoh (0)