Illinois Universiteti tadqiqotchilari mushak to‘qimasidan yasalgan va elektr yordamida harakatga keltiriladigan bio-robot ixtiro qildi. Bu haqda The Verge nashri xabar berdi.
2012-yilda ham olimlar yurak to‘qimasidan qilingan bio-robot haqida xabar bergan, biroq u o‘zi harakatga kelishi va doimiy harakatda bo‘lishi sabab boshqarish uchun noqulay bo‘lgan.
Bir santimetrdan kichik ushbu bio-robot hayvon va insonlardagi mushak-pay-suyak harakatini o‘zida takrorlaydi. U elektr yordamida harakatga keltirilgani bois, unga qancha katta chastotadagi elektr toki ta’sir ettirilsa, u shuncha tez harakatga keladi.
“Biologiya katta kuchga ega, agar undan foydali dasturlarda foydalana olsak, u bizga ulkan narsalarni olib keladi” – deydi loyiha rahbari Rashid Bashir.
Tadqiqotchilarning fikriga ko‘ra, bunday bio-robotlardan meditsina hamda atrof-muhitni tozalash maqsadida foydalanish mumkin.