Saudiya Arabistonida erkaklar o‘z xotinlari uchun futbol bo‘yicha JCh paytida yurish-turish qoidalarini ishlab chiqdi

Saudiya Arabistoni erkaklari futbol bo‘yicha jahon chempionati vaqtida o‘z ayollari uchun alohida yurish-turish qoidalarini o‘rnatishmoqda. Qoidalarni buzganlarga qizil kartochkalar bilan jarima solinadi, deb yozadi “ITAR-TASS”.

Ayollar uchun ishlab chiqilgan va Arabiston OAVlarida chop etilgan bunday cheklovlar to‘plami mualliflaridan birining ta’kidlashicha, bunday chora-tadbirlar chempionat davomida oiladagi munosabatlarni xavf ostiga qo‘ymaslik, shuningdek turli xil mojaro va janjallarning oldini olish uchun ishlab chiqilgan.

“Kasallikni davolagandan ko‘ra uning oldini olgan ma’qul”, – deb aytdi u jurnalistlarga. Qoidalar yozilgan ro‘yxatni muallif katta shaklda chop ettirib uyining devorlariga osib chiqdi. Ularga ko‘ra, birinchidan ayol turmush o‘rtog‘ini o‘zining har qanday rejalari haqida, xoh u qarindoshlarinikiga mehmonga borish bo‘lsin, xoh dugonalari bilan uchrashish bo‘lsin, futbol musobaqasidan ikki soat oldin ogohlantirishi lozim. Ikkinchidan, savdo markazlari va do‘konlarga xarid uchun aylanishga borish rejalari futbol o‘yinlari o‘tkazilmaydigan kunlarga rejalashtirilishi lozim.

Saudiya Arabistonida islom dinining ultrakonservativ oqimi jamiyatning hayotida asosiy o’rinni egallagani bois ayollar ko‘plab huquq va erkinliklardan mahrumdirlar. Jumladan, diniy qoidalar ularga avtomashina boshqarishni taqiqlaydi. Shu tariqa, bu mamlakatdagi ayollar biror yerga borish uchun oiladagi erkak qarindoshlari – ota yoki turmush o‘rtoqlariga ehtiyoj sezadi.