KXDRning Janubiy Koreya raketaga qarshi mudofaasini yengish bo‘yicha sinovlari muvaffaqiyatli o‘tdi

KXDR yana bir raketa sinovini muvaffaqiyatli o‘tkazdi. Bunda ular Janubiy Koreya raketaga qarshi mudofaasi vositalariga bardosh bera olish imkoniyatlarini tekshirib ko‘rdi. Bu haqda “ITAR-TASS” xabar berdi.

Sinovdan o‘tgan No-Dong ballistik raketasi 1,3 ming kilometr masofaga ucha oladi va Yaponiyaning butun hududidagi barcha nishonlarni yo‘q qila oladi.

2014-yil martida ushbu raketaning uchish burchagi o‘zgartirilgan, natijada uning parvoz masofasi 650 kilometrgacha qisqargan. Ekspertlar hisoblashicha, bu holda No-Dong Janubiy Koreya hududidagi nishonlarni ura oladi. Seuldagi Patriot raketaga qarshi mudofaa qurilmalari esa burchak o‘zgarishi natijasida tezligi oshgan No-Dong’ni tutib ololmaydi.

Bunday vaziyatlarni hisobga olgan Seul ayni paytda uzoq masofaga uchuvchi zenit raketalarini ishlab chiqmoqda. Ular No-Dong eng yuqori tezlik olib ulgurmasidan, uni o‘z trayektoriyasining yuqori qismida ura oladi.