Milliy matbuot markazida O‘zbekiston charm-poyabzal sanoatini yanada rivojlantirish masalasiga bag‘ishlangan matbuot anjumani o‘tkazildi. Tadbir “O‘zbekcharmpoyabzali” uyushmasi tomonidan tashkil etildi. Bu haqda O‘zA xabar berdi.
“O‘zbekcharmpoyabzali” uyushmasi raisining o‘rinbosari Sh.Sheraliyevning aytishicha, bugun sohada teri xomashyosini tayyorlash va qayta ishlash, poyabzal va sun’iy charm ishlab chiqarish bo‘yicha 75 korxona, shuningdek, charmdan attorlik mollari ishlab chiqaruvchi korxonalar faoliyat ko‘rsatmoqda. 2014-yilning besh oyi davomida ular tomonidan qariyb 130 milliard so‘mlik mahsulot, qiymati 50 milliard so‘mdan ziyod xalq iste’moli tovarlari ishlab chiqarildi.
Ayni paytda terini qayta ishlash, charmdan kiyim tayyorlash, tormoz kolodka va nakladkalari, xalq iste’moli tovarlari va boshqa mahsulotlar ishlab chiqarish bo‘yicha yangi korxonalar tashkil qilishga doir to‘qqizta investitsiya loyihasi amalga oshirilayotir. “Angren” va “Jizzax” maxsus industrial zonalarida, Namangan, Qashqadaryo va Buxoro viloyatlarida yangi ishlab chiqarish quvvatlari ishga tushiriladi.
Umuman, joriy yilning o‘tgan davrida uyushma yangi korxonalar tashkil qilish va mahsulot turlarini kengaytirish bo‘yicha investitsiyalar shaklida ikki million dollarlik mablag‘ni o‘zlashtirdi. Bugungi kunda sohada to‘rt turdagi yangi mahsulot – qiymati 28 milliard so‘mlik tagcharm, kolodka, sopol koshin va sport inventarlari ishlab chiqarish mahalliylashtirilib, tayyorlanmoqda. Charm-poyabzal sanoati korxonalarining eksport hajmi 38,7 million dollarni tashkil etdi.
Izoh (0)