Nukuslik hunarmand qiz Hindistonda tajriba orttirish imkoniga ega bo‘ldi

Nukus shahrida milliy hunarmandchilik mahsulotlarining savdo-yarmarkasi o‘tkazildi, deb xabar bermoqda O‘zA.

O‘zbekiston Savdo-sanoat palatasi Qoraqalpog‘iston Respublikasi hududiy boshqarmasi, “Hunarmand” uyushmasi Qoraqalpog‘iston Respublikasi birlashmasi va qator tashkilotlar hamkorligida tashkil etilgan savdo-yarmarkasida yuzga yaqin hunarmand o‘z mahsulotlari bilan ishtirok etdi.

Tadbir doirasida o‘tkazilgan tanlovda turli nominatsiyalar bo‘yicha yosh hunarmandlar rag‘batlantirildi. “Eng yaxshi hunarmand” nominatsiyasi bo‘yicha birinchi o‘rinni egallagan Gulnora Yembergenova Germaniya xalqaro hamkorlik tashkiloti tomonidan Hindistonda tajriba orttirish imkonini beradigan yo‘llanmani qo‘lga kiritdi.

– Hududda faoliyat ko‘rsatayotgan hunarmand va xususiy tadbirkorlarni qo‘llab-quvvatlash, ular ishlab chiqarayotgan mahsulotlar bilan keng jamoatchilikni tanishtirishda bunday tadbirlar muhim ahamiyat kasb etadi, – deydi O‘zbekiston Savdo-sanoat palatasi Qoraqalpog‘iston Respublikasi hududiy boshqarmasi boshlig‘i Xo‘jamurat Qaypnazarov. – Binobarin, bu ularning o‘zaro tajriba almashishi, doimiy xaridor topishiga ham ko‘maklashadi.