“O‘zbekiston pochtasi” ochiq aksiyadorlik jamiyati tomonidan bolalar chizgan rasmlar asosida “Mening orzuim” maxsus pochta markalari tayyorlandi hamda O‘zbekiston Respublikasi Aloqa, axborotlashtirish va telekommunikatsiya texnologiyalari davlat qo‘mitasi buyrug‘i bilan 2014-yil 30-maydan muomalaga kiritildi. Bu haqda Infocom.uz xabar berdi.
Maxsus pochta markalari uchun 2014-yil 15-yanvardan 15-martgacha o‘tkazilgan “Mening orzuim” mavzusidagi bolalar ijodiy rasmlari respublika tanlovi g‘oliblari chizgan suratlar tanlab olindi. Tanlov “O‘zbekiston pochtasi” ochiq aksiyadorlik jamiyati, O‘zbekiston Respublikasi Aloqa, axborotlashtirish va telekommunikatsiya texnologiyalari davlat qo‘mitasi hamda O‘zbekiston badiiy akademiyasi hamkorligida tashkil etildi.
Tanlovda hay’at a’zolariga sakkiz yoshdan 12 yoshgacha bo‘lgan ishtirokchilarning o‘zlari chizgan 1227 ta rasmi taqdim etildi. Sakkiz yoshli Sardor Suleymanovning “Kosmonavt” deb nomlangan surati birinchi o‘ringa loyiq deb topildi. Ikkinchi o‘ringa to‘qqiz yoshli Kamila Axmadovaning “Quvnoq kamalak” rasmi, uchinchi o‘ringa esa 11 yoshli Valeriya Fomichevaning “Do‘stlik” nomli surati munosib ko‘rildi.
Bolalar rasmlari asosida chiqarilgan “Mening orzuim” maxsus pochta markalari xat va banderollarda dunyo bo‘ylab tarqaladi.
Izoh (0)