Chilida muzliklar orasida dinozavr murdalaridan iborat yirik mozor topildi. Bu haqda Tabiat tarixi milliy muzeyi olimi Kristian Salasar ma’lum qildi, deya xabar berdi “ITAR-TASS”.
Topilma mamlakat janubidagi “Torres-del-Payne” milliy bog‘i hududida aniqlandi. U yerda 46 nusxadagi ixtiozavrlar topilgan bo‘lib, ularning qoldiqlari bizgacha yaxshi saqlangan. “Ulardan biri ikkita embrionga ega, bu esa topilmalarning deyarli noyob ekanidan dalolat beradi”, — dedi Salasar.
Bundan tashqari, ushbu ixtiozavrlar mozori bugungacha ma’lum bo‘lganlari orasida eng kattalaridan biriligi ta’kidlandi.
Shuningdek, olimlar yirtqichlarning tarixgacha bo‘lgan turlariga tegishli qoldiqlarni ham topishdi.
Ixtiozavrlar — dinozavrlar davridagi eng yirik dengiz sudralib yuruvchilari. Ular bundan taxminan 99 million yil avval qirilib ketgan.
Izoh (0)