AQShda yosh ovcharka o‘z egasining mashinasini ko‘lga cho‘ktirdi

AQShning Massachusets shtatida uch oylik nemis ovcharkasi o‘z xo‘jayinlarining avtomobilini ko‘lga cho‘ktirib yubordi. Bu haqda Reuters xabar berdi.

Voqea 1-iyun kuni ro‘y berdi. O‘shanda kuchukchaning egasi Jon Kostello u bilan sayrga chiqqan edi. Kostelloning aytishicha, uyga qaytmoqchi bo‘lib turishganida, ovcharka mashinani harakatga keltirgan. Avtomobil Bolivar ko‘li yonginasida to‘xtab turgan. Xo‘jayini mashina eshigini ochishi bilan kuchukcha unga quvnoq holda sakrab chiqqan, so‘ng panjasi bilan uzatmalar qutisiga tegib ketgan va gaz pedali ustiga yiqilib tushgan.

Mashina bir necha metr yurib, suvga qulagan. Voqea joyiga yetib kelgan politsiyachilarning aytishicha, avtomobil suvda “suzib” chiqqach, yaroqsiz holatga kelib qolgan.

Sug‘urta mashinani qayta tiklash xarajatlarini qoplash-qoplamasligi haqida xabar berilmayapti. Shuningdek, yosh ovcharkaning bu xatti-harakatiga nisbatan qanday choralar ko‘rilishi noma’lum.