IIVda O‘zbekiston – Latviya qo‘shma komissiyasining majlisi o‘tkazildi

O‘zbekiston Respublikasi Ichki ishlar vazirligida Uyushgan jinoyatchilik, terrorizm, narkotik vositalar, psixotrop moddalar va prekursorlarning noqonuniy aylanishiga qarshi kurashishda hamkorlik bo‘yicha O‘zbekiston – Latviya qo‘shma komissiyasining navbatdagi majlisi bo‘lib o‘tdi. Bu haqda O‘zA xabar berdi.

Tadbirda ikki mamlakatning ichki va tashqi ishlar, xavfsizlik, sog‘liqni saqlash, bojxona kabi sohalarga oid vazirlik hamda idoralari rahbar va vakillari ishtirok etdi.

O‘zbekiston Respublikasi ichki ishlar vazirining birinchi o‘rinbosari, qo‘shma komissiya hamraisi R.Mamatov O‘zbekiston bilan Latviya o‘rtasidagi hamkorlik barcha yo‘nalishlarda izchil rivojlanib borayotganini, bunda ikki davlat rahbarlarining uchrashuvlarida erishilgan kelishuvlar muhim huquqiy asos bo‘lib xizmat qilayotganini alohida ta’kidladi.

– O‘zbekiston har tomonlama istiqbolli mamlakat, – dedi Latviya Respublikasi ichki ishlar vazirligining parlament kotibi, qo‘shma komissiya hamraisi Evika Silinya. – O‘zbekiston bilan o‘zaro munosabatlarimiz barcha sohalar qatori uyushgan jinoyatchilikning turli ko‘rinishlariga qarshi kurashish borasida ham izchil rivojlanmoqda. Mamlakatlarimiz o‘rtasidagi hamkorlikni yanada kengaytirish, qator sohalarda muntazam ravishda fikr va tajriba almashish niyatidamiz.

Majlisda uyushgan jinoyatchilik, terrorizm, narkotik vositalar, psixotrop moddalar va prekursorlarning noqonuniy aylanishi, odam savdosi kabi tahdid va xatarlarga qarshi birgalikda kurashish, axborot xavfsizligi tizimini takomillashtirishga oid masalalar yuzasidan atroflicha fikr almashildi.

Latviya delegatsiyasi a’zolari O‘zbekiston Respublikasi Bosh prokuraturasida uchrashuv o‘tkazdi. Unda huquq-tartibot, xususan, narkotik vositalarning noqonuniy aylanishi va odam savdosiga qarshi kurashish sohasidagi hamkorlikka oid dolzarb vazifalar muhokama qilindi.

Shuningdek, O‘zbekiston Respublikasi Davlat bojxona qo‘mitasi, Vazirlar Mahkamasi huzuridagi narkotik moddalarni nazorat qilish milliy axborot-tahlil markazida ham uchrashuvlar bo‘lib o‘tdi.