Uch yil davomida eronlik xakerlar AQSh, Isroil va boshqa davlatlar harbiy va siyosiy yetakchilari ustidan ijtimoiy tarmoqlardagi soxta akkauntlar va yolg‘ondakam yangilik saytlari yordamida kuzatuv olib borgan. Bu haqda “RIA Novosti” xabar berdi.
Ushbu maxfiy operatsiyani fosh qilgan ISight Partners kompaniyasining ma’lum qilishicha, xakerlar AQSh harbiy-dengiz kuchlari admirali, amerikalik siyosatchilar, elchilar, shuningdek, Buyuk Britaniya, Saudiya Aarabistoni, Suriya, Iroq va Afg‘oniston vakillarini kuzatgan.
ISight Partners kiberjosuslik qurboni bo‘lganlarning ism-shariflari va aynan qanday axborotlar o‘g‘irlanganini oshkor qilishdan bosh tortdi.
Eronlik xakerlar NewsOnAir.org soxta yangiliklar saytini yaratib, unda ishlovchi 14 kishini to‘qib chiqargan. Ular uchun turli ijtimoiy tarmoqlarda akkauntlar ochib, “nishon”larning oila a’zolari, yaqinlari bilan aloqa o‘rnatishgan. Ularga avval NewsOnAir.org saytidagi maqolalarga tegishli linklarni yuborgan, ishonchga kirgach, zararkunanda dasturiy ta’minot ilova qilingan linklarni jo‘nata boshlagan.
ISight Partners ushbu kiberjosuslik kampaniyasining chuqur o‘ylab qilinganini e’tirof etdi va “Ular asta-sekinlik bilan ishlashgan va ko‘rinmas bo‘lishga harakat qilishgan”, — dedi.
Xakerlarning Eron hukumati bilan bog‘liqligi bor-yo‘qligi noma’lum, biroq ISight Partners’ning fikricha, operatsiya murakkabligini hisobga olganda, ular o‘z davlatlaridan yordam olgan bo‘lishi mumkin.
Izoh (0)