Dunyodagi eng og‘ir odam 48 yoshida vafot etdi

2007-yilda dunyoda eng og‘ir kishi deb tan olingan meksikalik Manuel Uribe 26-may kuni 48 yoshida vafot etdi. Bu haqda Associated Press xabar berdi.

Shifokorlar hozircha o‘lim sababini aniqlagani yo‘q, biroq Manuel yuragi va jigarida muammolar bo‘lgani ma’lum. U yurak aritmiyasi tufayli 2-may kuni Monterrey shahar kasalxonasiga yuk ko‘taruvchi kran yordamida keltirilgan va 24 kundan so‘ng shu yerda hayotdan ko‘z yumgan.

2001-yilda 597 kilogramm vazn to‘plagan Uribe o‘rnidan turolmay qolgan. 2007-yilda esa uning vazni 560 kilogrammni tashkil etgan. Parhez va shifokorlar yordamida meksikalik 2008-yilda 360 kilogrammgacha ozgan. Vafoti chog‘ida uning vazni 394 kilogrammga teng bo‘lgan.

Ayni paytda Saudiya Arabistonida yashovchi Halid bin Muhsin Shaariy 610 kilogramm vazn bilan sayyoramizdagi eng og‘ir kishi hisoblanadi.