Markaziy razvedka boshqarmasi va Milliy xavfsizlik agentligi sobiq xodimi Edvard Snouden orqali qo‘lga kiritilgan ma’lumotlarni matbuotda e’lon qilib boradigan amerikalik jurnalist Glenn Grinvald AQSh hukumati yashirincha kuzatgan shaxslarning ismlarini oshkor qilishga va’da berdi. Bu haqda “ITAR-TASS” xabar berdi.
AQSh OAVlari ma’lumotlariga ko‘ra, ism-shariflar ro‘yxati Intercept onlayn-nashri tomonidan e’lon qilinadi. Ushbu nashr eBay internet-auksioni asoschisi Pyer Omidyar tomonidan moliyalashtiriladi. Grinvald 2013-yil oxirida — Britaniyaning Guardian gazetasini tark etgach, ushbu manba bilan hamkorlik qila boshlagan.
Edvard Snouden bilan bog‘liq mojaro 2013-yil iyunida kelib chiqqan edi. O‘shanda u AQSh maxsus xizmatlari internet va mobil aloqa orqali butun dunyodagi foydalanuvchilarni kuzatib borgani haqidagi maxfiy axborotlarni fosh etgan edi.
2013-yilning 1-avgust kuni esa Rossiya hukumati AQSh maxsus xizmatlarining sobiq xodimi bir yillik muddatga vaqtinchalik boshpana berishga qaror qilgan edi.
Izoh (0)