2014-yilda O‘zbekiston sog‘liqni saqlash tizimiga 407 mlrd so‘m ajratildi
Termizda davolash-profilaktika muassasalarining moddiy-texnik bazasini yanada yaxshilash masalalariga bag‘ishlangan seminar o‘tkazildi. Bu haqda O‘zA xabar berdi.
Seminarda 2014-yilga mo‘ljallangan investitsiya dasturi doirasida O‘zbekiston sog‘liqni saqlash tizimini yanada rivojlantirish, davolash-profilaktika muassasalarining moddiy-texnik bazasini mustahkamlash uchun 407 milliard so‘m ajratilgani qayd etildi. Ishtirokchilar viloyat ko‘p tarmoqli tibbiyot markazi, Termiz tumanidagi “Do‘stlik”, “Sabzipoya” qishloq vrachlik punktlari faoliyati va ish tajribasi bilan tanishdi.
Surxondaryo viloyatida 7 ming 455 o‘ringa mo‘ljallangan 39 shifoxona, 284 ambulatoriya-poliklinika, o‘n beshta davlat sanitariya-epidemiologiya nazorat markazi aholiga sifatli tibbiy xizmat ko‘rsatmoqda. Qo‘shni davlatlar bilan chegaradosh hududlardagi to‘rtta sanitariya-nazorat punktida xavfli va yuqumli kasalliklar tarqalishining oldini olishga alohida e’tibor qaratilmoqda. 245 zamonaviy qishloq vrachlik punkti mijozlarga birlamchi tibbiy yordam ko‘rsatmoqda.
– Joriy yilga mo‘ljallangan investitsiya dasturi doirasida 20 milliard 316 million 800 ming so‘m mablag‘ ajratilib, to‘qqizta tibbiyot muassasasida qurilish-rekonstruksiya ishlari olib borilmoqda, – deydi viloyat sog‘liqni saqlash boshqarmasi boshlig‘i A. Qo‘chqorov. – Tubdan rekonstruksiya qilinayotgan muassasalar zamonaviy tibbiy asbob-uskunalar bilan jihozlanayotir. Bularning natijasida ona va bola salomatligini muhofaza qilish, sog‘lom avlodni dunyoga keltirish, aholining reproduktiv salomatligini mustahkamlash bo‘yicha sezilarli yutuqlarga erishilmoqda.
Ta’kidlash joiz, viloyatda 2010—2012-yillarda investitsiya dasturi doirasida 50 milliardan ziyod, o‘tgan yili 22 milliard 634 million so‘m o‘zlashtirilib, Oltinsoy, Qumqo‘rg‘on, Sherobod va Jarqo‘rg‘on tumanlari tibbiyot birlashmalari tubdan rekonstruksiya qilindi. Jumladan, viloyat ko‘p tarmoqli va bolalar ko‘p tarmoqli tibbiyot markazlari, sil kasalliklari shifoxonasi yangilandi. Rekonstruksiya ishlari yakunlangan Denov tuman perinatal markazi foydalanishga topshirildi. O‘nta yangi qishloq vrachlik punkti barpo etildi.
