G‘arbiy Ural mashinasozlik konserni prezidenti Aleksandr Pozdeyev O‘zbekistonda huquqni muhofaza qilish organlari qarori bilan hibsdan ozod etildi. Ayni paytda u o‘z vataniga qaytib borgan, deya xabar berdi Gazeta.uz “RIA Novosti” ma’lumotiga tayanib.
Avvalroq Toshkentdagi sud “G‘arbiy Ural mashinasozlik konserni” YoAJ prezidenti rossiyalik Aleksandr Pozdeyevga nisbatan qo‘llanilgan qamoqda saqlash chorasini hech qayoqqa chiqib ketmaslik to‘g‘risidagi tilxat bilan almashtirgani xabar berilgan edi.
Rossiya Federatsiyasining O‘zbekistondagi elchixonasi iqtisodiy masalalar bo‘yicha maslahatchisi Vadim Chekmazovning aytishicha, RF elchixonasi xodimlari u bilan uchrashgan. “Pozdeyevning sog‘lig‘i yaxshi emas, u shifoxonada yotib davolanishi kerak”, — dedi u.
Jinoyat ishi G‘UMK tomonidan amalga oshirilgan shartnomalar narxini oshirganlik bo‘yicha qo‘zg‘atilgan. Ayni paytda G‘UMK O‘zbekistonda umumiy qiymati 200 million dollarga teng loyihalarni amalga oshirmoqda.
Pozdeyev kaliy zavodi bo‘yicha jinoiy ish yuzasidan O‘zbekiston Bosh prokuraturasiga tergovga chaqirilgan, shundan so‘ng hibsga olingan.
2010-yil sentabrida G‘UMK Qashqadaryo viloyatidagi Dehqonobod kaliy o‘g‘itlari zavodi uchun xomashyo qazib chiqarish majmuasini qurib bergan. Uning yillik quvvati 1 million tonna rudaga teng bo‘lib, loyiha qiymati 60 million dollarni tashkil etgan.
2015-yil boshigacha kompaniya ushbu zavod uchun uzunligi 30 kilometrli yuk tashuvchi dor yo‘lini qurib bitkazishni rejalashtirgan edi.
Izoh (0)