Braziliyaning San-Paulu va Rio-de-Janeyro shaharlarida futbol bo‘yicha jahon chempionatini o‘tkazishga qarshi ish tashlash va norozilik namoyishlari o‘tkazildi. Bu haqda “ITAR-TASS” xabar berdi.
San-Pauluda ketma-ket ikki kun avtobus haydovchilari va konduktorlar ish tashladi. Natijada millionlab odamlar ishga va uyga vaqtida yetib bora olmadi, metro bekatlarida esa olomon to‘planib qoldi.
Rio-de-Janeyro va Braziliyaning yana olti shtatida kun bo‘yi fuqaro politsiyasi xodimlari ish tashlash namoyishlarini o‘tkazdi. Ular ish haqini oshirish va xizmat sharoitlarini yaxshilashni talab qildi.
21-may kuni kechqurun Rio-de-Janeyroda Braziliyada 12-iyun – 13-iyul kunlari bo‘lib o‘tadigan jahon chempionatiga tayyorgarlik uchun davlat byudjeti mablag‘lari ajratilishiga qarshi bo‘lgan olomon to‘plandi. 600 ga yaqin namoyishchilar hukumatdan sog‘liqni saqlash va ta’lim tizimini moliyalashtirish hajmini oshirishni talab qildi.
Tunga yaqin vaziyat yaxshi tomonga o‘zgardi: haydovchilar o‘z ishlariga qaytdi, politsiya esa JCh o‘tkaziladigan davrda ish tashlamasligi ma’lum qildi.
Hukumat turnir davomida ommaviy norozilik harakatlari bo‘lishini kutmoqda, muzokaralar yo‘li bilan ularning oldini olish choralarini ko‘rmoqda.
Izoh (0)