Poytaxtda jismoniy imkoniyati cheklangan yoshlar o‘rtasida paralimpiya o‘yinlari bo‘lib o‘tdi, deb xabar bermoqda O‘zA.
“Sog‘lom bola yili” Davlat dasturi ijrosi doirasida O‘zbekiston milliy paralimpiya assotsiatsiyasi tomonidan qator vazirliklar, davlat va jamoat tashkilotlari bilan hamkorlikda tashkil etilgan musobaqada mamlakatning turli hududlaridagi maxsus maktab-internatlarda tarbiyalanayotgan 100 nafarga yaqin o‘g‘il-qiz tennis, stol tennisi, qilichbozlik, parakanoe, yengil atletika va o‘q otish sport turlari bo‘yicha o‘zaro kuch sinashdi.
– Jismoniy imkoniyati cheklangan yoshlarni har tomonlama qo‘llab-quvvatlashga qaratilgan bunday tadbirlar alohida ehtiyojli o‘g‘il-qizlarning o‘zini jamiyatning haqiqiy a’zosi deb his etishiga hamda ertangi kunga bo‘lgan ishonchini yanada mustahkamlashga xizmat qiladi, – deydi yengil atletika bo‘yicha O‘zbekiston paralimpiya terma jamoasi bosh murabbiyi Sardor Abduxoliqov.
– Bunday musobaqalar sportga bo‘lgan qiziqishimizni oshiradi, oldimizga qo‘ygan maqsadlarimizga erishishimizda katta kuch-g‘ayrat bag‘ishlaydi, – deydi musobaqa g‘olibi, buxorolik Marat Zaripov. – Kelajakda jahon arenalarida ham Vatanimiz sharafini munosib himoya qilish niyatidaman.
Musobaqa yakunida g‘olib va sovrindorlarga diplom va esdalik sovg‘alari topshirildi. Paralimpiya o‘yinlari san’at ustalarining konsert dasturi bilan yakunlandi.
Izoh (0)