Alisher Navoiy nomidagi O‘zbekiston Milliy bog‘ida “Kitob bizni birlashtiradi” mavzusida kitobxonlik festivali bo‘lib o‘tdi. Bu haqda O‘zA xabar berdi.
“Sog‘lom bola yili” Davlat dasturi doirasida O‘zbekiston Respublikasi Xalq ta’limi vazirligi, Respublika Baynalmilal madaniyat markazi, Respublika bolalar kutubxonasi tomonidan Respublika Ma’naviyat targ‘ibot markazi va O‘zbekiston Yozuvchilar uyushmasi hamkorligida tashkil etilgan tadbirda o‘qituvchilar, ma’naviyat targ‘ibotchilari, axborot-resurs markazlari xodimlari, o‘quvchi-yoshlar ishtirok etdi.
Tadbir doirasida O‘zbekistondagi nashriyot-matbaa ijodiy uylarida chop etilgan yangi kitoblar ko‘rgazmasi tashkil etildi.
– Maktabimiz va mehribonlik uyimizdagi kutubxona badiiy kitoblarga boy, – deydi poytaxtimizning Chilonzor tumanidagi 23-mehribonlik uyi tarbiyalanuvchisi, 182-umumta’lim maktabining 7-sinf o‘quvchisi Polina Kurishova. – Bu yerda o‘zbek va o‘ndan ortiq tillardagi bolalar adabiyoti namunalari bilan tanishish mumkin. Men G‘afur G‘ulomning “Shum bola”, Xudoyberdi To‘xtaboyevning “Sariq devni minib” asarlarini qayta-qayta o‘qiyman. Kitob – eng yaxshi do‘st. Chunki ular bizni vatanparvarlikka, mehnatsevarlikka, halollikka, odobga, maqsad sari intilishga o‘rgatadi.
Festivalda eng faol kitobxonlarga bolalar adabiyotlaridan iborat sovg‘alar topshirildi. Milliy madaniyat markazlari qoshidagi bolalar badiiy jamoalarining chiqishlari tadbirga yanada jo‘shqinlik bag‘ishladi.