Surxondaryolik otaxon Mahmud Nomozovning konsertiga to‘liq — uch kun kelishini ma’lum qildi

19—21-may kunlari “Istiqlol” san’at saroyida bo‘lib o‘tayotgan O‘zbekiston xalq artisti Mahmud Nomozovning konsert dasturida “Daryo” xodimlari ham ishtirok etdi va konsert suratlarini e’tiboringizga havola etamiz.

Mahmud Nomozovning ta’kidlashicha, rasmdagi otaxon Surxondaryodan tashrif buyurgan bo‘lib, u konsertda to‘liq — uch kun mehmon bo‘lishini ma’lum qilgan. Tadbirning o‘tkazilgan ikki kunida ham otaxon kelib, Mahmud Nomozovning sho‘x taronalariga raqsga tushgan.

Konsertni boshlovchi va xonanda Tolibjon Isroilov olib bormoqda. Konsert uch qismdan iborat bo‘lib, har bir qismda sakkiztadan tarona taqdim etilmoqda. Shuningdek, konsertda “Handalak” guruhi ijodkorlari — Zokir Ochildiyev va Ortiq Sultonov o‘zlarining chiqishlari bilan ishtirok etmoqda.

Konsertning har bir kuniga taniqli insonlar tashrif buyurdi. Masalan, dastlabki kunlarda Gulsanam Mamazoitova, Orolmirzo Safarov, boshlovchi Akmal Mirzo, Lola Ahmedova va boshqa ijodkorlar tashrif buyurdi.

Eslatib o‘tamiz, Mahmud Nomozovning konserti bugun, 21-may kuni o‘z nihoyasiga yetadi.