17-may kuni Toshkent Markaziy vokzalidan chiqqan “Salomatlik poyezdi” Surxondaryo va Qashqadaryo viloyatlariga qarab yo‘l oldi. Ushbu aksiya 23-mayga qadar davom etadi. Bu haqda “Turkiston press” xabar berdi.
“O‘zbekiston temir yo‘llari” davlat aksiyadorlik temir yo‘l kompaniyasi bilan birgalikda “Salomatlik poyezdi” Surxondaryo va Qashqadaryo viloyatlari bo‘ylab “Toshkent—Sariosiyo—Qumqo‘rg‘on—Boysun—Oqrobod—Dehqonobod—Toshkent” yo‘nalishlarida tashkil qilindi.
Navbatdagi “Salomatlik poyezdi”da yuqori malakali shifokorlar guruhi aholiga zarur tibbiy va ijtimoiy yordam ko‘rsatish maqsadida xizmat safariga otlandi. Ta’kidlash joiz, “Salomatlik poyezdi” shifokorlari Fondning Surxondaryo va Qashqadaryo viloyatlaridagi Tibbiy-ijtimoiy patronaj brigadasi xodimlari bilan birgalikda faoliyat olib boradi. Ushbu xayriya aksiyasi davomida aholiga va davolash profilaktika muassasalariga qiymati 160,5 ming AQSh dollari va 11,9 million so‘mga teng insonparvarlik yuklari (turli mahsulotlar, oyoq kiyimlari, dori-darmon va tibbiyot anjomlari, sanitariya-gigiyena vositalari va boshqalar)dan iborat muruvvat yordamlari yetkazib beriladi.
Bu aksiya “Sog‘lom avlod uchun” Fondi tomonidan AQShning AmeriCares va Resourse & Police Exchange xalqaro tashkilotlari, Bolgariyaning Sofarma kompaniyasi, Nestle Uzbekistan qo‘shma korxonasi, “O‘qituvchi” nashriyot-matbaa ijodiy uyi, “Baxteks” MChJ, “Shaffof servis” qo‘shma korxonasi va boshqalar ko‘magida amalga oshirilmoqda.
“Salomatlik poyezdi” ish rejasi davomida Sariosiyo, Qumqo‘rg‘on, Boysun, Oqrobod, Dehqonobod stansiyalariga yaqin hududlardan tashqari “Sog‘lom avlod uchun” fondi Surxondaryo va Qashqadaryo viloyat hududiy filiallarining avtoambulans mashinasi orqali hududdagi barcha “Muruvvat”, “Mehribonlik” va “Saxovat” uylari, shu bilan bir qatorda markaziy shifoxonalar, viloyat bolalar tug‘ruq komplekslariga hamda imkoniyati cheklangan bolalar maxsus maktab internatlariga ham mehr-muruvvat yordami ko‘rsatish rejalashtirilgan.
Rejaga asosan, 2014-yil 17-may kuni yo‘lga chiqqan “Salomatlik poyezdi” 18-maydan o‘z ishini boshladi. Bir hafta davomida malakali mutaxassislar tomonidan hududlardagi nogiron bolalar, xotin-qizlar, boquvchisini yo‘qotgan va ko‘p bolali oilalar a’zolari tibbiy ko‘rikdan o‘tkaziladi. Shuningdek, aksiya doirasida joylardagi maxsus muassasalar, yordamchi maktab va maktabgacha ta’lim muassasalariga muruvvat yordamlarini topshirish bilan bir vaqtda malakali shifokorlar ishtirokida aholi orasida sog‘lom turmush tarzi targ‘ibotiga bag‘ishlangan uchrashuvlar tashkil etish ko‘zda tutilgan.
Izoh (0)