Poytaxtda “Eng namunali oila” respublika ko‘rik-tanlovi g‘oliblarini taqdirlashga bag‘ishlangan tadbir bo‘lib o‘tdi, deb yozadi O‘zA.
O‘zbekiston Xotin-qizlar qo‘mitasi tomonidan tashkil etilgan mazkur tanlovda Qoraqalpog‘iston Respublikasi, viloyatlar va Toshkent shahar bosqichida g‘oliblikni qo‘lga kiritgan oilalar ishtirok etdi.
Madaniyat va sport ishlari, Xalq ta’limi vazirliklari, O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, O‘zbekiston “Mahalla” xayriya jamoat fondi, Kasaba uyushmalari federatsiyasi kengashi, Milliy g‘oya va mafkura ilmiy-amaliy markazi, “Kamolot” yoshlar ijtimoiy harakati, “Sog‘lom avlod uchun” xalqaro xayriya fondi, “Oila” ilmiy-amaliy markazi bilan hamkorlikda tashkil etilgan “Eng namunali oila” ko‘rik-tanlovi bosqichlarida turli hududlardagi 9 mingdan ortiq oila ishtirok etdi.
Ularni saralashda oiladagi ma’naviy muhitni o‘zaro hurmat, mehr-oqibat asosida shakllantirish, farzandlarni go‘zal axloq, jismoniy va ruhiy uyg‘unlikda kamolga yetkazish, qo‘ni-qo‘shnichilik, qadriyatlarni e’zozlash, mamlakatda ahil, ma’naviyatli oilalarni barpo etish borasidagi ezgu sa’y-harakatlarni targ‘ib etish kabi jihatlarga asosiy e’tibor qaratildi.
– Oiladagi muhit o‘zaro hurmat va ishonch, mas’uliyat, sabr-qanoat, shukronalik kabi tuyg‘ular mustahkam qaror topganiga asoslanadi, – deydi qoraqalpog‘istonlik Injagul Saburova. – Turmush o‘rtog‘im va men ko‘p yillardan buyon o‘qituvchilik qilamiz. Olti nafar farzandni tarbiyalab voyaga yetkazdik.
Tanlov yakuniga ko‘ra, Nukus shahridagi 7-“Shoirlar ovuli” mahalla fuqarolar yig‘inida istiqomat qiluvchi Burkit Piyazov oilasi, Navoiy viloyati Qiziltepa tumanidagi “Hofqoriyon” mahalla fuqarolar yig‘inida yashovchi Maqsud Norov oilasi, Farg‘ona viloyati Beshariq tumanidagi “Toshariq” mahalla fuqarolar yig‘inida istiqomat qiluvchi Murodjon Yusupov oilasi birinchi o‘ringa loyiq topildi. Shu bilan birga, o‘ndan ortiq nominatsiya bo‘yicha g‘olib va sovrindorlar aniqlanib, ularga diplom hamda esdalik sovg‘alari topshirildi.