AQShning besh nafar xitoylik harbiy mansabdorlarga yo‘naltirlgan kiberjosuslik ayblovlari shunchaki to‘qima, shu sababli Xitoy Xalq Respublikasi internet-hamkorlik bo‘yicha Xitoy-Amerika ishchi guruhi faoliyatini to‘xtatishga majbur. Bu haqda 19-may kuni XXR tashqi ishlar vaziri vakili e’lon qildi, deya xabar berdi “ITAR-TASS”.

“Bunday ayblovlar xalqaro hamkorlik me’yorlarini jiddiy ravishda buzadi hamda AQSh va Xitoy o‘rtasidagi o‘zaro ishonchni yo‘qotadi”, — deyiladi bayonotda. XXR tashqi ishlar vazirligi AQShni o‘z xatosini tan olib, xitoylik ofitserlar ustidan jinoiy qidiruvni to‘xtatishga chaqirdi.

AQSh davlat departamenti rasmiy vakili Jen Psaki esa Xitoyning ishchi guruh faoliyatini to‘xtatish haqidagi qaroriga achinish bildirdi. “Xitoy bilan amaliy va samarali munosabatlar o‘rnatishda davom etishga umid qilishga haqqimiz bor, deb o‘ylaymiz”, — dedi u. Psaki so‘zlariga ko‘ra, AQSh “boshqa bunday faoliyatga yo‘l qo‘ymaslik ustida Xitoy bilan birga ishlashga tayyor”.