Andijon shahrida Xalqaro sanoat yarmarkasi va Kooperatsiya birjasining hududiy bosqichi bo‘lib o‘tdi. Unda 200 dan ziyod ishlab chiqarish korxonasi o‘z mahsulotlarini namoyish etdi, deb xabar bermoqda O‘zA.
Sanoat yarmarkasida viloyatdagi korxona va tashkilotlar, kichik biznes va xususiy tadbirkorlik subyektlari tomonidan ishlab chiqarilgan mahsulotlar namoyish etildi. Shuningdek, Namangan, Farg‘ona, Navoiy viloyatlari hamda Toshkent shahrida faoliyat olib borayotgan ishlab chiqarish korxonalari ham o‘z mahsulotlari bilan ishtirok etdi.
— Korxonamizda yurtimizda ishlab chiqarilayotgan Matiz, Damas, Spark va boshqa rusumdagi avtomobillar uchun 41 turdagi butlovchi qismlar tayyorlanmoqda, — deydi Jalaquduq tumanidagi “Topaz” xususiy korxonasi rahbari Abduvali Boltaboyev. — 50 ga yaqin kishi mehnat qilayotgan jamoamiz 2014-yilning o‘tgan davrida GM-Uzbekistan qo‘shma korxonasiga 615 million so‘mlik mahsulot yetkazib berdi.
– Korxonamiz asosan avtomobillar uchun o‘rindiqlar ishlab chiqaradi, – deydi O‘z Tong Xon Ko O‘zbekiston-Janubiy Koreya qo‘shma korxonasi rahbari Avazbek Jalilov. – Bundan tashqari, futbol, basketbol, voleybol va tennis to‘plari, stol tennisi va badminton raketkalari ishlab chiqarish ham yo‘lga qo‘yilgan. Mahsulotimizga ichki bozorda ham, tashqi bozorda ham talab ortib bormoqda. Ayni paytda 30 foizdan ziyod mahsulotlar eksport qilinmoqda.
Tadbirda “Sharq yulduzi”, “Fayz farm lyuks”, “Oliy xizmat”, “Abror” korxonalarining bejirim va o‘ziga xos dizaynga ega mebel mahsulotlari ham ko‘pchilikda katta qiziqish uyg‘otdi.
Sanoat yarmarkasida ishlab chiqaruvchilar, chakana va ulgurja savdo korxonalari vakillari o‘rtasida 16 milliard so‘mlikdan ziyod hamkorlik shartnomalari tuzildi.
Izoh (0)