Bolqondagi eng kuchli deya ta’riflanayotgan suv toshqini natijasida kamida 44 kishi halok bo‘ldi. Bu haqda hodisadan zarar ko‘rgan mamlakatlar hukumatlari ma’lumotlariga tayanib, Interfax xabar berdi.
Ularning 27 nafari Bosniya va Gersegovinada, 16 nafari Serbiyada va bir kishi Xorvatiyada qurbon bo‘lgan.
Mintaqada 120 yillik meteokuzatuvlar davomida eng kuchli deb topilgan toshqin sel kelishi natijasida sodir bo‘ldi. Sinoptiklar baholashicha, uch kun ichida mintaqada yog‘ingarchilikning uch oylik me’yori yog‘gan.
Sava daryosi toshib ketgach, Bosniya sharqidagi Biyelin shahridan 10 mingdan ortiq kishi evakuatsiya qilingan. Ba’zi aholi punktlarida suv uylarning ikkinchi qavatigacha ko‘tarilgan. U yerda istiqomat qiluvchilar vertolyot yordamida qutqarilgan.
Yomg‘ir avji o‘tgan bo‘lsa-da, toshqin bilan bog‘liq vaziyat yomonlashishi ehtimoli bor. Belgradda Sava daryosi o‘zanidan chiqib ketishi mumkin. Suv sathining ko‘tarilishi natijasida Sava qirg‘oqlaridagi yirik elektr stansiyalariga ziyon yetishi mumkin.
Zarar ko‘rgan hududlarda Yevropa va Rossiya qutqaruvchilari ishlamoqda.
Izoh (0)