Samarqand shahrida “O‘rta asrlar Sharq allomalari va mutafakkirlarining tarixiy merosi, uning zamonaviy sivilizatsiya rivojidagi roli va ahamiyati” mavzusidagi xalqaro konferensiya yakunlandi. Bu haqda O‘zA xabar berdi.
Anjumanning sho‘ba majlislarida Sharq allomalarining astronomiya, matematika, geografiya va geodeziya kabi aniq fanlar shakllanishidagi o‘rni, tibbiyot, farmakologiya, kimyo va mineralogiya singari tabiiy fanlar rivojlanishiga qo‘shgan ulkan hissasi, shuningdek, o‘rta asrlar mutafakkirlarining tarixiy va falsafiy merosi, tilshunoslik va adabiyot sohalaridagi yutuqlari haqida so‘z yuritildi.
Al-Xorazmiy ilmiy merosining Temuriylar davri arxitekturasi va epigrafikasiga ta’siri, Abu Rayhon Beruniy va geologiyada geodinamika g‘oyasining shakllanishi, Ahmad al-Farg‘oniyning gidrologiyaga oid kashfiyotlari, Ibn Sino ilmiy merosi hamda uning tibbiyot va farmatsevtika rivojlanishidagi o‘rni, Mahmud Zamaxshariyning tilshunoslik sohasidagi xizmatlari, Mirzo Ulug‘bek va u tashkil etgan ilmiy maktabning matematika va astronomiya taraqqiyotiga qo‘shgan hissasi, Alisher Navoiy va Zahiriddin Muhammad Bobur asarlarining jahon adabiyoti va madaniyati rivojidagi ahamiyati kabi qator mavzularda ma’ruzalar tinglandi va muhokama etildi.
Xalqaro konferensiyaning yakuniy hujjati qabul qilindi.
Anjuman ishtirokchilari Samarqand avtomobilsozlik hamda Yengil sanoat va iqtisodiyot kasb-hunar kollejlarida bo‘lib, mamlakatimizda joriy etilgan 12-yillik uzluksiz ta’lim tizimi samaralari bilan tanishdi. Mehmonlar yoshlarning xalqaro standartlar asosida, zamon talablariga mos ta’lim-tarbiya olishi uchun yaratilgan sharoit va imkoniyatlarga yuksak baho berdi.
Tarixiy obidalar, buyuk allomalarimiz nomi bilan bog‘liq majmualar ziyorati, istiqlol yillarida bunyod etilgan zamonaviy inshootlar ishtirokchilarda unutilmas taassurot qoldirdi.
Izoh (0)